Përzgjedhësi i Kroacisë kritikon gjykimin: Penallti shumë e butë, gjykim në favor të vendasve

Përzgjedhësi i Kroacisë, Slaven Biliç, ka shprehur pakënaqësinë e tij me gjykimin në ndeshjen ndaj Anglisë, të cilën kroatët e humbën me rezultat 2:1 në kuadër të Ligës së Kombeve. Biliq vlerësoi paraqitjen e skuadrës së tij, duke theksuar se Kroacia meritonte më shumë nga kjo përballje, ndërsa kritikoi edhe penalltinë e akorduar në favor të Anglisë. “Luajtëm mirë, ndjenja është e ngjashme me atë pas ndeshjes me Spanjën. Jemi një kombëtare shumë e madhe për të qenë krenarë pas një humbjeje, por mendoj se meritonim shumë më tepër. Pas humbjes 7:0 nuk ishte e lehtë të vinim në stadiumin e tyre dhe të luanim në këtë mënyrë, me karakter dhe iniciativë”, deklaroi Biliç për “Nova TV”. Duke folur për gjykimin, ai u ndal veçanërisht te penalltia që vendosi ndeshjen. “E kam parë vetëm një herë dhe nuk dua të jap një vlerësim përfundimtar, por sipas mendimit tim ishte një penallti shumë e butë. Gjykimi ishte tepër në favor të vendasve”, u shpreh Biliç. Ai foli edhe për skemën taktike të skuadrës, duke shpjeguar se synimi ishte kufizimi i ndikimit të Andersonit dhe Rice në mesfushë. Sa i përket ndeshjes së ardhshme ndaj Çekisë, mesazhi i tij ishte i qartë: “Do të shkojmë për fitore. Çekia është një skuadër serioze. Për ta konfirmuar cilësinë që treguam ndaj Spanjës dhe Anglisë, duhet të zhvillojmë një ndeshje të shkëlqyer dhe të fitojmë”.