Takimi Kurti-Pashinjan në Paris ndez alarmin në Beograd: Armenia drejt njohjes së Kosovës?

Kryeministri i Armenisë, Nikol Pashinjan, ka zhvilluar një takim zyrtar me kryeministrin e Kosovës, Albin Kurti, në margjinat e Forumit të Paqes në Paris. Ajo që ka tërhequr vëmendjen e opinionit publik dhe ka shkaktuar reagime të ashpra në Serbi, është mënyra e pritjes: në tavolinën e bisedimeve ishin të vendosura flamujt shtetërorë të të dyja vendeve, ndërsa Pashinjan në komunikimin e tij zyrtar iu referua Kurtit me titullin “kryeministër i Kosovës”. Takimi u realizua më 10 nëntor, ndërsa kryeministri armen ndau në rrjetet sociale pamje nga ky takim, duke e shoqëruar postimin me mbishkrimin e qartë: “Takim me kryeministrin e Kosovës, Albin Kurti”. Sipas njoftimit zyrtar të Zyrës së Kryeministrit të Armenisë, të transmetuar nga agjencia shtetërore Armenpress, fokusi i bisedimeve ishte thellimi i marrëdhënieve dypalëshe, me theks të veçantë te bashkëpunimi ekonomik dhe tregtar. Gjithashtu, krerët e dy qeverive shkëmbyen pikëpamje mbi zhvillimet rajonale dhe mundësitë që ofron stabiliteti pas marrëveshjes së paqes mes Armenisë dhe Azerbajxhanit. Kjo ngjarje ka shkaktuar një valë spekulimesh në Beograd. Media serbe “Novosti” e ka interpretuar këtë gjest të Pashinjan si një sinjal se Armenia mund të jetë duke ndryshuar kursin e saj politik drejt njohjes së shtetësisë së Kosovës. Sipas këtij burimi, ndonëse Kurti dhe Pashinjan janë takuar edhe më parë në Mynih apo Jerevan, kjo është hera e parë që kreu i qeverisë armene përdor zyrtarisht titullin “kryeministër i Kosovës” në prani të simboleve shtetërore të Kosovës. Media serbe e ka përshkruar këtë zhvillim me ton alarmant, duke shtuar se “duket se ka filluar” dhe se kjo çështje kërkon vëmendjen urgjente të politikës së Beogradit. Megjithatë, deri në këtë moment, Armenia nuk ka bërë asnjë deklaratë zyrtare që konfirmon ndryshimin e qëndrimit të saj sa i përket pavarësisë së Kosovës. Pavarësisht kësaj, intensifikimi i kontakteve mes Prishtinës dhe Jerevanit është i dukshëm. Një moment kyç ishte vizita e Kurtit në Jerevan më 3 maj, ku në takimin me Pashinjanin, kreu i ekzekutivit kosovar shprehu mirënjohjen për kontributin e ushtrisë armene në kuadër të misionit të KFOR-it dhe për forcimin e lidhjeve ndërshtetërore.