Sulmi në Ibër-Lepenc, dëshmitarja rrëfen në gjykatë momentet e tmerrit: Shtëpia u trondit nga shpërthimi, mendova se ishte tërmet

Gjatë seancës gjyqësore të mbajtur të martën në Gjykatën Themelore në Prishtinë, lidhur me rastin e sulmit në kanalin e Ibër-Lepencit në Varagë të Zubin-Potokut, ku të pandehur janë dy vëllezërit Dragisha dhe Jovan Viqentijeviq, si dhe Igor Dimoviq, ka dëshmuar banorja e zonës, Milena Lazareviq. E pyetur nga trupi gjykues, dëshmitarja Lazareviq ka treguar se forca e eksplozivit ka qenë aq e madhe sa ka lëvizur themelet e shtëpisë së saj. Ajo ka shtuar se në momentin e parë ka besuar se bëhej fjalë për një fatkeqësi natyrore. "Detonimi ka qenë i madh, është shkundur shtëpia, themeli ka lëvizur, si dhe qynga e shporetit ka dalë nga vendi dhe në ato momente kam menduar se mos është ndonjë tërmet", ka përfshirë në dëshminë e saj Lazareviq. Sipas dëshmisë së saj, menjëherë pas shpërthimit ajo ka dalë nga dritarja për të kuptuar se çfarë kishte ndodhur, duke parë një masë të madhe uji që vërshonte drejt pronës së saj, ndërsa automjetet në rrugën magjistrale ishin detyruar të ndalonin për shkak të rrezikut. E pyetur në lidhje me dëmet materiale, ajo ka përmendur se pasojat kanë qenë të konsiderueshme për ekonominë e tyre familjare, duke prekur tokat bujqësore dhe objektet e blegtorisë, megjithatë ajo ka theksuar se nuk ka ndërmend të kërkojë kompensim financiar nga personat e akuzuar. Në pyetjen e drejtuar nga kryetari i trupit gjykues, Vesel Ismaili, dëshmitarja ka sqaruar se për vëllezërit Jovan dhe Dragisha Viqentijeviq, të cilët akuzohen së bashku me Igor Dimoviqin për këtë ngjarje, kishte dëgjuar vetëm përmes raporteve mediatike.