Përshkallëzim i tensioneve: Estonia akuzon hapur Moskën për sabotim pas sulmit në kompaninë e mbrojtjes

Autoritetet në Estoni kanë hedhur akuza të drejtpërdrejta ndaj Rusisë, duke e fajësuar për një sulm me zjarrvënie të regjistruar gjatë muajit gusht në ambientet e kompanisë së njohur të mbrojtjes, "Milrem Robotics". Përmes një deklarate të bërë në platformën sociale X, ministri i Jashtëm estonez, Markus Tsahkna, u shpreh se ekzistojnë prova të mjaftueshme për të konfirmuar se incidenti në Talin ishte një akt sabotazhi i orkestruar nga strukturat e inteligjencës së Federatës Ruse. Nga ana e tij, Kremlini i ka hedhur poshtë këto pretendime, duke i cilësuar ato si plotësisht të pabazuara. Në të njëjtën linjë, drejtuesi i agjencisë estoneze të sigurisë kombëtare ka ndarë hollësi shtesë rreth këtij operacioni, duke e cilësuar atë si të planifikuar me kujdes dhe të zbatuar me urdhër të shërbimeve secrete ruse. Sipas tij, modus operandi i përdorur në këtë sulm ndaj "Milrem Robotics" përkon plotësisht me skenarë të ngjashëm sabotazhi të evidentuar kohët e fundit në vende të ndryshme të Evropës, të cilët mbajnë firmën e Moskës. Kjo agjenci ka arritur në përfundimin se faji i takon drejtpërdrejt shtetit rus, mbështetur në të dhënat e inteligjencës dhe në bashkëpunimin e ngushtë me partnerët vendas dhe ndërkombëtarë. Zyrtarët estonezë paralajmërojnë se përpjekjet e Kremlinit për të destabilizuar brenda vendit dhe për të dobësuar solidaritetin me Ukrainën pritet të mbeten të larta edhe gjatë viteve në vijim. Estonia nuk është e vetmja anëtare e NATO-s dhe Bashkimit Evropian që ngre alarmin ndaj veprimeve të treguara nga Rusia. Më parë, Gjermania fajësoi Moskën për një tentativë sulmi me dronë në aeroportin e Lajpcigut, ndërsa incidente të ngjashme me shkelje të hapësirës ajrore janë raportuar në Poloni, Rumani dhe Lituani. Gjatë një konference për shtyp të martën, sekretari i përgjithshëm i NATO-s, Mark Rutte, i cili ndodhej krah kryeministrit lituanez Mindaugas Sinkevičius, deklaroi se fushata hibride e ndërmarrë nga Rusia nuk po arrin të japë efektet e dëshiruara. "Rusia po dështon në fushatën e saj, po dështon në fushëbetejë në Ukrainë, ashtu siç po dështon në minimin e unitetit dhe mbështetjes sonë për Ukrainën," u shpreh Rutte. Ai dërgoi një mesazh të qartë drejt Moskës, duke nënvizuar se aleanca do të intensifikojë mbështetjen për Kievin dhe se NATO disponon të gjitha opsionet e nevojshme për t'u kundërpërgjigjur, pavarësisht se ato nuk bëhen gjithmonë publike.