Debati për portën: Sebastian Frey vë përballë Donnarummën dhe Maignan para supersfidës Itali-Francë

Sonte, stadiumi legjendar 'San Siro' do të jetë skena e një përballjeje prestigjioze mes Italisë dhe Francës, në kuadër të xhiros së pestë të Ligës A në Ligën e Kombeve. Në prag të këtij takimi, Sebastian Frey, ish-portieri i njohur i kombëtares franceze dhe i disa skuadrave elitare në Serie A, ka ndarë mendimet e tij në një intervistë për 'Corriere della Sera'. Ai e cilësoi këtë duel si një përballje të veçantë, duke theksuar se, pavarësisht rivalitetit historik mes dy vendeve, marrëdhëniet mes tyre ruajnë një frymë respekti. Frey konfirmoi pjesëmarrjen e tij në stadium me ftesë të Zinedine Zidane, duke shprehur kureshtjen për të vëzhguar nga afër dy kombëtaret që ndodhen në faza të ndryshme të zhvillimit të tyre. Një nga pikat kryesore të diskutimit ishte padyshim krahasimi mes dy gardianëve të portës: Mike Maignan dhe Gianluigi Donnarumma. Frey vlerësoi lart aftësitë e të dyve, duke i cilësuar si profesionistë me përvojë ndërkombëtare, të cilët kanë dëshmuar vlerat e tyre përmes sfidave të ndryshme në karrierë. Megjithatë, kur u pyet se kë do të veçonte, ish-portieri francez nuk hezitoi të japë një përgjigje të qartë. Ai ia dha përparësinë Donnarummës, duke argumentuar se suksesi i tij i vazhdueshëm dhe trofetë e shumtë të fituar ndër vite, përfshirë triumfin në Champions League, e bëjnë atë një zgjedhje më të kompletuar në krahasim me kolegun e tij.