Kosova synon ndërtimin e pesë digave strategjike, bashkëpunim i ngushtë me Turqinë për sigurinë ujore

Ministrja e Mjedisit, Planifikimit Hapësinor dhe Infrastrukturës, Fitore Pacolli, ka zhvilluar një takim të rëndësishëm bilateral me ministrin e Bujqësisë dhe Pylltarisë së Turqisë, Ibrahim Yumakli. Takimi u zhvillua në kuadër të Konferencës së Kombeve të Bashkuara për Ndryshimet Klimatike (COP31), e cila po mbahet në Antalia të Turqisë. Nëpërmjet një njoftimi publik, ministrja Pacolli ka bërë të ditur se fokusi i bisedimeve ka qenë intensifikimi i bashkëpunimit ndërmjet dy shteteve në sektorin e menaxhimit të burimeve ujore, infrastrukturës së digave dhe menaxhimit të rrjedhave lumore. Palët kanë konfirmuar gjithashtu finalizimin e një Memorandumi Mirëkuptimi, i cili pritet të formalizojë asistencën teknike në këto fusha strategjike. Duke e vënë theksin te siguria ujore si një ndër prioritetet kryesore të dikasterit që ajo drejton, Pacolli zbuloi se Kosova ka në plan realizimin e pesë digave të reja strategjike. Për këtë qëllim, përvoja e gjerë e Turqisë në ndërtimin dhe menaxhimin e digave të mëdha konsiderohet si një mbështetje thelbësore për ekspertizën teknike të nevojshme. Ministrja Pacolli vlerësoi se bashkëpunimi me autoritetet turke do të jetë vendimtar për avancimin e projekteve infrastukturore të Kosovës, duke e cilësuar Turqinë si një partner strategjik në përpjekjet e vendit për forcimin e qëndrueshmërisë dhe sigurisë së burimeve ujore në nivel kombëtar.