Incident diplomatik: Nëntë anëtarë të delegacionit somalez zhduken pa gjurmë nga Prishtina

Një ngjarje e pazakontë diplomatike ka tronditur autoritetet e Kosovës, pasi nëntë anëtarë të një delegacioni zyrtar nga Somalia janë larguar në rrethana misterioze nga vendi ku ishin akomoduar në kryeqytet. Qeveria e Kosovës i ka dërguar një kërkesë zyrtare shtetit somalez, duke kërkuar sqarime urgjente lidhur me fatin dhe vendndodhjen e këtyre personave. Sipas një note verbale të datës 30 tetor 2026, me numër reference 4868-561/26, Ministria e Punëve të Jashtme dhe Diasporës e Kosovës ka shprehur shqetësim të thellë për këtë zhvillim. Dokumenti zyrtar thekson se, përkundër përpjekjeve, institucionet kosovare nuk kanë arritur të konfirmojnë nëse nëntë anëtarët e delegacionit ndodhen ende brenda territorit të vendit apo nëse kanë arritur të largohen drejt ndonjë destinacioni tjetër. Delegacioni somalez, i cili mbërriti në Kosovë më 25 tetor 2026 përmes linjës ajrore 'Turkish Airlines', kryesohej nga Said Mohamed Mohamud, ministër shtetëror për Punët Publike, Banimin dhe Rindërtimin, si dhe Fartuun Abdikadir Farah, zëvendësministre e Porteve. Sipas protokollit shtetëror, grupi ishte vendosur në një resort villash në periferi të Prishtinës. Alarmimi i autoriteteve ndodhi më 28 tetor, kur gjatë përgatitjeve për transferimin e delegacionit drejt aeroportit, u konstatua se nëntë anëtarët shoqërues kishin braktisur akomodimin e tyre që nga mbrëmja e 27 tetorit, rreth orës 19:10. Largimi i tyre është bërë në mënyrë të fshehtë, pa njoftuar stafin përgjegjës që ishte ngarkuar me mbikëqyrjen e tyre gjatë qëndrimit në Kosovë. Ndërsa ministri Mohamud dhe zëvendësministrja Farah u larguan nga Kosova më 28 tetor sipas itinerarit të parashikuar, nëntë anëtarët e tjerë nuk u shfaqën asnjëherë në terminalin VIP të Aeroportit Ndërkombëtar të Prishtinës. Protokolli Shtetëror ka tentuar të marrë përgjigje nga përfaqësuesit e delegacionit, por nuk ka marrë asnjë informacion konkret mbi arsyet e këtij largimi. Nëpërmjet kësaj note diplomatike, Prishtina zyrtare ka kërkuar nga Ministria e Punëve të Jashtme dhe Bashkëpunimit Ndërkombëtar të Somalisë që të ofrojë detaje të plota mbi sigurinë e personave në fjalë. Gjithashtu, është kërkuar që autoritetet somaleze të mbajnë të informuar palën kosovare për çdo ndryshim apo informacion të ri që mund të hedhë dritë mbi këtë rast të paprecedentë.