Samiti i Brukselit / Rama: Shqipëria ka tejkaluar rajonin në turizëm, synojmë vizitorët elitarë

Kryeministri i Shqipërisë, Edi Rama, mori pjesë këtë të martë në punimet e Samitit të Euronews 2026 për Turizmin, i cili po zhvillohet në qytetin e Brukselit. Gjatë paraqitjes së tij, kreu i qeverisë vuri inë dukje se sektori i turizmit në vend po shënon një zgjerim të pandalshëm nga viti në vit. Duke vënë theksin te zhvillimi i infrastrukturës, Rama theksoi se Aeroporti i Rinasit ka lënë pas aeroportet e tjera të rajonit, duke e krahasuar atë konkretisht me atë të Beogradit. Ai vuri në pah edhe planet konkrete për të ardhmen, duke përfshirë ngritjen e një aeroporti sezonal në jug të vendit, si dhe përpjekjet e vazhdueshme për ta bërë plotësisht funksional aeroportin e Kukësit. Sa i përket qasjes ndaj investimeve, shefi i ekzekutivit shqiptar shpjegoi se synimi është tërheqja e një kategorie më të lartë vizitorësh, të cilët shpenzojnë më shumë, duke synuar kështu turizmin elitar krahas atij me të ardhura të mesme. “Objektivi ynë është bota, se po zbulojmë që të gjitha pjesët e botës po marrin pjesë në këtë rritje. Kur nisëm këtë udhëtim transformues, numëronim 2 milionë turistë dhe kjo shifër përfshinte edhe zyrtarët që bënin numërimin, se çdo shqiptar që hynte e dilte në vend ishte pjesë e kësaj shifre. Paraardhësi im ishte turist kur u kthye në Shqipëri. Vitin e kaluar, 12 milionë të huaj. Mes tyre, japonezë, amerikanë, amerikano-latinë, kinezë, izraelitë, vizitorë nga Lindja e Mesme”, u shpreh ndër të tjera Rama. Kreu i qeverisë shtoi se ky bum vizitorësh ka ndodhur pavarësisht faktit se Shqipëria ende nuk krenohet me infrastrukturën më ideale në glob. “Kemi një aeroport që është me rritjen më të shpejtë në Evropë. I kemi lënë fqinjët pas për të pestin ose gjashtin vit. Kemi lënë pas aeroportin e Beogradit. Tani do të hapim një aeroport të ri në Vlorë, po punojmë për një aeroport tjetër sezonal në jug. Është dhe një i katërt në zonën malore, por nuk po punon ashtu siç do donim”, përfundoi fjalën e tij kryeministri.