Kurti zhvillon takimin e parë me kryeministrin hungarez: Fokus te bashkëpunimi ekonomik dhe siguria

Kryeministri i Kosovës, Albin Kurti, ka zhvilluar takimin e tij të parë zyrtar me homologun hungarez, Péter Magyar, në margjinat e Samitit të Komunitetit Politik Evropian (EPC). Në një njoftim pas takimit, kreu i ekzekutivit kosovar bëri të ditur se biseda është fokusuar në mundësitë për forcimin e marrëdhënieve ndërshtetërore, me synimin për të zgjeruar bashkëpunimin në sektorë kyç, siç janë arsimi dhe ekonomia. “Jemi të interesuar për një intensitet të ri në marrëdhëniet dypalëshe, duke zgjeruar e thelluar bashkëpunimin në një sërë sferash, nga arsimi tek ekonomia”, ka shkruar Kurti në lidhje me këtë takim. Po ashtu, Kurti e ka vlerësuar lart rolin e Hungarisë në ruajtjen e stabilitetit, duke veçuar kontributin e saj përmes trupave në kuadër të misionit të KFOR-it. Ai theksoi se prezenca hungareze mbetet thelbësore për paqen dhe sigurinë në rajonin e Ballkanit Perëndimor. Në përmbyllje të takimit, kryeministri Kurti potencoi se procesi i forcimit institucional të Kosovës dhe integrimi i vendit në strukturat ndërkombëtare janë hapa të domosdoshëm për të garantuar stabilitet afatgjatë dhe një të ardhme të sigurt evropiane për të gjithë rajonin.