Dimri 'paralizon' Norvegjinë: Reshjet e para të borës shkaktojnë kaos në trafik dhe transport

Norvegjia është zgjuar nën pushtetin e reshjeve të para të dendura të borës për këtë sezon, të cilat kanë sjellë probleme të shumta në infrastrukturën e vendit. Qytetarët janë përballur me vështirësi të mëdha në lëvizje, duke nisur nga anulimet e transportit publik e deri te aksidentet e pashmangshme rrugore. Instituti Meteorologjik Norvegjez kishte paralajmëruar që të martën afrimin e frontit të ftohtë, me parashikime për akumulime deri në 15 centimetra në Norvegjinë Lindore dhe deri në 30 centimetra në veri. Përderisa fillimisht alarmi mbulonte zonat e Oslos, Akershus, Østfold, Vestfold dhe pjesët e ulëta të Buskerud-it, situata u përshkallëzua të enjten në mëngjes. Një alarm i verdhë është aktivizuar tashmë edhe për rajonet Innlandet dhe Hamar, ndërsa një paralajmërim specifik për reshje bore është lëshuar edhe për Norvegjinë Perëndimore. Meteorologia Hanne Beate Skattør shprehu habinë për ndikimin e menjëhershëm të reshjeve, duke theksuar se: “Është gjithmonë befasuese se sa pak borë mjafton për të shkaktuar probleme. Me reshjet e para të borës krijohet gjithmonë kaos”. Në të njëjtën linjë, Per Magne Eftang, menaxher operacionesh në Policinë e Juglindjes, raportoi për një numër të lartë aksidentesh dhe automjetesh të rrëshqitura nga rruga, duke u bërë thirrje drejtuesve të automjeteve që të shtojnë distancën e sigurisë dhe të planifikojnë më shumë kohë për udhëtimet e tyre. Kryeqyteti Oslo u ndie veçanërisht i goditur që nga orët e hershme të mëngjesit. Sipas të dhënave, mbi 1 000 nisje autobusësh regjistruan vonesa, ndërsa 65 për qind e linjave u anuluan plotësisht. Përveç trafikut rrugor, policia raportoi edhe për pemë të rrëzuara mbi automjete të parkuara, si dhe për bllokim të qarkullimit në autostradën E6 në zonën e Skulleruddumpa-s, ku dy kamionë mbetën të ngujuar. Edhe operacionet ajrore nuk mbetën pa u prekur. Aeroporti i Oslos raportoi vonesa të shumta në fluturime, ndërsa ekipet e operatorit Avinor po punojnë pa ndërprerje për të mbajtur pistat të pastra dhe të sigurta për lëvizjen e avionëve.