Snopçe: Zhvillimet në Kuvend po cenojnë rëndë parimet e demokracisë parlamentare

Deputeti i Aleancës për Shqiptarët, Halil Snopçe, ka shprehur shqetësimin e tij të thellë lidhur me praktikën e fundit në Kuvend, duke e cilësuar atë si një precedent të rrezikshëm për mbarëvajtjen e sistemit demokratik, veçanërisht gjatë seancave të dedikuara për pyetjet e deputetëve. Snopçe sqaroi se Rregullorja e Kuvendit e garanton qartë të drejtën e opozitës për t'iu drejtuar ekzekutivit me pyetje në një hapësirë kohore prej dy orësh. Megjithatë, sipas tij, po ndodhin keqpërdorime procedurale që po e pamundësojnë këtë proces. "Kemi të bëjmë me një interpretim absurd të Rregullores. Kur kërkohet pauzë, e cila automatikisht ndërpret ushtrimin e kësaj të drejte, më pas përdoret si arsyetim fakti se dy orët kanë skaduar. Kjo është një lloj skizofrenie politike: të kesh një të drejtë të garantuar, e më pas koha e humbur në pauza të përdoret si argument për ta mohuar atë," deklaroi Snopçe. Në vijim të reagimit të tij, deputeti denoncoi edhe pengesat gjatë fjalës së tij, duke theksuar se ndërhyrja e koordinatorit të OBRM-PDUKM-së gjatë fjalimit nga vendi ia ka pamundësuar atij që të shprehet deri në fund, duke e konsideruar këtë si një shkelje të mëtejshme të të drejtave të opozitës në Kuvend.