Kurti zhvillon takimin e parë me kryeministrin hungarez, Péter Magyar: Synohet forcimi i bashkëpunimit dypalësh

Kryeministri i Kosovës, Albin Kurti, ka realizuar takimin e tij të parë zyrtar me homologun hungarez, Péter Magyar, në margjina të Samitit të Komunitetit Politik Evropian (EPC). Në një prononcim pas këtij takimi, kreu i ekzekutivit kosovar bëri të ditur se është diskutuar për hapjen e një kapitulli të ri në raportet ndërmjet dy shteteve, me fokus të veçantë në zgjerimin e partneritetit në sektorë kyç si ekonomia dhe arsimi. “Jemi të interesuar për një intensitet të ri në marrëdhëniet dypalëshe, duke zgjeruar e thelluar bashkëpunimin në një sërë sferash, nga arsimi tek ekonomia”, ka shkruar Kurti përmes një njoftimi pas takimit. Një pjesë e rëndësishme e bisedës i është kushtuar edhe kontributit të Hungarisë në sigurinë e Kosovës. Kurti ka vlerësuar lart rolin e Budapestit zyrtar, duke e cilësuar si një ndër kontribuuesit kryesorë me trupa ushtarake brenda forcave të KFOR-it, rol ky që konsiderohet jetik për ruajtjen e paqes në rajon. Duke analizuar perspektivën e mëtejme, kryeministri Kurti nënvizoi se konsolidimi i institucioneve të Kosovës dhe avancimi i proceseve integruese mbeten elemente thelbësore për garantimin e stabilitetit afatgjatë dhe të ardhmes evropiane të të gjithë rajonit të Ballkanit Perëndimor.