Diskriminim në Spitalin e Kumanovës: Asnjë shqiptar mes 80 të punësuarve të rinj

Valë e re punësimesh në Spitalin e Kumanovës ka ngjallur reagime të ashpra për shkak të mungesës së plotë të përfaqësimit etnik shqiptar. Nga rreth 80 personat që janë angazhuar së fundmi në këtë institucion shëndetësor, rezulton se asnjëri prej tyre nuk i përket komunitetit shqiptar, fakt ky që ka nxitur debate të shumta mbi politikën e punësimit të zbatuar nga drejtori Sasho Stoshevski. Procesi i rekrutimit është realizuar në disa faza të ndryshme: fillimisht me 10 vendime të marra dy muaj më parë, pasuar nga angazhimi i 7 personave me kontratë një muaj më parë dhe 7 të tjerëve javën që shkoi. Valën më të madhe e përbëjnë 62 personat e angazhuar ditët e fundit. Përkundër përpjekjeve për të marrë një qëndrim zyrtar nga drejtori Stoshevski lidhur me këtë përbërje etnike të të punësuarve, ai ka zgjedhur të heshtë, duke qenë i pakapshëm për mediat gjatë gjithë ditës. Opozita ka reaguar ashpër ndaj këtij zhvillimi, duke e lidhur këtë diskriminim me shfuqizimin e mekanizmit të balancuesit. Arbër Ademi nga BDI-ja theksoi se ky rast është dëshmi e dështimit të premtimeve të koalicionit VLEN. Sipas tij, përjashtimi i shqiptarëve nga ky konkurs është pasojë e drejtpërdrejtë e shfuqizimit të balancuesit, për të cilin, siç u shpreh ai, përfaqësuesit e VLEN-it kishin premtuar se do ta avanconin me ligj, ndërsa në praktikë po ndodh e kundërta. Nga ana tjetër, ministri i Ekonomisë dhe Punës, Besar Durmishi, është shprehur se ky vendim do të jetë objekt shqyrtimi brenda strukturave partiake dhe komisionit kadrovik. Durmishi ka paralajmëruar se në periudhën në vijim do të ketë punësime të reja si në Spitalin e Kumanovës, ashtu edhe në institucione të tjera, duke shprehur qëndrimin se proceset e ardhshme do të përfshijnë banorë të rajonit dhe të qytetit të Kumanovës. Kjo nuk është hera e parë që menaxhimi i Sasho Stoshevskit vihet nën llupën e kritikave. Edhe më herët, ai është përballur me akuza lidhur me avancimet dhe emërimet brenda klinikave të spitalit. Ndonëse drejtori kishte premtuar respektim të meritokracisë dhe rregullim të përfaqësimit, veprimet konkrete mungojnë. Në nivel vendi, si në institucionet qendrore ashtu edhe ato lokale, po vërehet një trend shqetësues ku përfaqësimi i drejtë dhe adekuat po shpërfillet në mënyrë sistematike gjatë proceseve të punësimit.