Pacolli takohet me ministrin turk Yumakli, paralajmëron ndërtimin e pesë digave strategjike në Kosovë

Ministrja e Mjedisit, Fitore Pacolli, ka zhvilluar një takim bilateral me ministrin e Bujqësisë dhe Pylltarisë së Turqisë, İbrahim Yumaklı, në kuadër të Konferencës së OKB-së për Klimën COP31, që po mbahet në Antalia. Përmes një postimi, Pacolli bëri të ditur se në takim është diskutuar për një Memorandum Mirëkuptimi që pritet të nënshkruhet ndërmjet dy vendeve, për bashkëpunim teknik në fushën e burimeve ujore, infrastrukturës së digave dhe menaxhimit të lumenjve. “Në kuadër të COP31 në Antalia, zhvillova takim bilateral me Ministrin e Bujqësisë dhe Pylltarisë së Turqisë, z. İbrahim Yumaklı. Diskutuam për Memorandumin e Mirëkuptimit që do ta nënshkruajmë për bashkëpunim teknik në fushën e burimeve ujore, infrastrukturës së digave dhe menaxhimit të lumenjve”, ka shkruar Pacolli.