Nufi nga Oslo: Anëtarësimi i Kosovës në NATO, çelësi për stabilitetin afatgjatë të Evropës

Ministri i Mbrojtjes i Shqipërisë, Ermal Nufi, ka vlerësuar se përfshirja e Kosovës në strukturat e NATO-s nuk është vetëm një aspiratë, por një imperativ strategjik për të garantuar paqen në rajon, për të neutralizuar mundësinë e konflikteve dhe për të parandaluar krijimin e vatrave të reja të krizës në kontinentin evropian. Këto deklarata ministri Nufi i dha gjatë punimeve të Forumit për të Ardhmen e Atlantikut të Veriut 2026, i cili po zhvillohet në kryeqytetin norvegjez, Oslo. Ai vuri në pah rolin thelbësor të këtij organizimi në intensifikimin e bashkëpunimit mes shteteve aleate dhe forcimin e lidhjeve ndëratlantike. Në margjina të këtij forumi, kryediplomati i mbrojtjes shqiptare zhvilloi takime dypalëshe me homologun e tij nga Norvegjia, Tore O. Sandvik, si dhe me Nënsekretarin Parlamentar të Shtetit në Ministrinë e Punëve të Jashtme të Mbretërisë së Bashkuar, Lord Wood of Anfield. Duke iu drejtuar të pranishmëve, ministri Nufi potencoi se rajoni i Ballkanit Perëndimor, me theks të veçantë Kosova, duhet të mbetet prioritet në agjendën e Aleancës. Sipas tij, siguria e hapësirës euroatlantike është e lidhur ngushtë me stabilitetin e Ballkanit, ndaj një NATO më prezente dhe më e fuqishme në këtë pjesë të botës do të reflektohej direkt në një siguri më të lartë për të gjithë Evropën. Forumi i këtij viti, i cili ka mbledhur figura të shquara politike, ushtarake dhe përfaqësues të industrisë së mbrojtjes nga vendet anëtare, organizohet nën patronazhin e përbashkët të qeverive të Mbretërisë së Bashkuar dhe Norvegjisë.