Materazzi për goditjen me kokë të Zidanes: Pas vdekjes së portierit, mendova se çfarë mund të më kishte ndodhur

Dy dekada pas goditjes me kokë që u bë një nga momentet më të famshme në historinë e Kupës së Botës, Marco Materazzi ka folur sërish për Zinedine Zidane. Në një intervistë për gazetën italiane “La Gazzetta dello Sport”, në prag të përballjes mes Italisë dhe Francës, ish-mbrojtësi italian ka treguar se mes tij dhe legjendës franceze nuk pati kurrë një pajtim zyrtar. Madje, ai ka bërë edhe një krahasim të pazakontë me një tragjedi të ndodhur së fundmi, vdekjen e portierit Jesús de Miguel. Materazzi ka pranuar se kjo ngjarje e bëri të reflektonte për pasojat që mund të kishte pasur goditja e marrë nga Zidane në finalen e Kupës së Botës 2006 në Gjermani. “Vdekja e Jesús de Miguel më bëri ta falënderoja Zotin që nuk ndodhi asgjë. Ai portier u akuzua për vrasje nga pakujdesia për shkak të një ndërhyrjeje. Çfarë do të kishte ndodhur nëse e njëjta gjë do të më ndodhte mua?”, u shpreh Materazzi. Deklarata e kampionit të botës vjen pasi Zidane së fundmi pranoi se nuk ndihet krenar për goditjen me kokë që i dha italianit gjatë vazhdimeve të finales së vitit 2006, megjithëse nuk pendohet për atë veprim. Materazzi i konsideron kontradiktore këto deklarata, të cilat kanë rikthyer në vëmendje një prej episodeve më të përfolura në historinë e futbollit. Përtej atij incidenti, ish-mbrojtësi italian ka zbuluar se vite më vonë kishte pasur një përpjekje për pajtim mes tyre. Sipas versionit të tij, të dy ishin takuar në nëntor të vitit 2010 në një hotel në Milano, në prag të ndeshjes mes Milanit dhe Real Madridit në Ligën e Kampionëve. “Unë iu afrova dhe ia zgjata dorën. Ai më tha: ‘Mos u shqetëso, ato janë gjëra të së kaluarës’”, kujtoi italiani. Megjithatë, Materazzi pretendon se Zidane më vonë e kishte mohuar këtë takim. “Ai tha se më kishte ngatërruar me një tifoz. Është për të ardhur keq. Kishte një mundësi për t’u pajtuar, por më pas ai u tërhoq nga gjithçka”, deklaroi ish-reprezentuesi italian. Sipas Materazzit, pesha e madhe mediatike e atij episodi vazhdon ta bëjë të vështirë një pajtim publik mes tyre. “Me gjasë, ishte një largim shumë dramatik për të qenë në gjendje të tërhiqej më pas”, shtoi ai. Pavarësisht gjithçkaje, Materazzi nuk i kurseu lavdërimet për Zidane si trajner. Ai vlerësoi veçanërisht aftësinë e francezit për të menaxhuar dhomat e zhveshjes me yje të mëdhenj te Real Madridi.