Tjetërsimi i pronave milionëshe në Prishtinë: Prokuroria kërkon paraburgim për zyrtarin e përfshirë

Prokuroria Themelore në Prishtinë ka ndërmarrë veprime ligjore ndaj një zyrtari, të identifikuar me inicialet M.B., duke kërkuar nga Gjykata Themelore në kryeqytet caktimin e masës së paraburgimit për 30 ditë. I dyshuari përballet me akuza për keqpërdorim të detyrës dhe autoritetit zyrtar. Sipas hetimeve paraprake, gjatë vitit 2023, M.B. në cilësinë e përgjegjësit për arkivin në Depon e Arkivit Ndërkomunal të Prishtinës, dyshohet se ka shpërdoruar kompetencat e tij. Ai akuzohet se ka dështuar në verifikimin e vërtetësisë së dokumentacionit arkivor, duke lejuar kështu manipulime. Bëhet e ditur se zyrtari në fjalë ka ndihmuar një person tjetër, të identifikuar si N.J., i cili aktualisht është në kërkim nga organet e rendit. Ata dyshohet se kanë përdorur dokumente publike të falsifikuara me qëllim që të përvetësonin në mënyrë të paligjshme prona publike, duke ia kaluar ato në posedim personit N.J. Në përpjekje për të parandaluar dëmet e mëtejshme, Prokurori i Shtetit ka urdhëruar ndalimin e përkohshëm të 48 parcelave, vlera e të cilave përllogaritet në miliona euro. Nga Prokuroria Themelore në Prishtinë konfirmojnë se janë duke bashkëpunuar ngushtë me Policinë e Kosovës për të zbardhur plotësisht rastin dhe për të intensifikuar luftën kundër dukurive negative, korrupsionit dhe krimit ekonomik.