Dy vite përballje me tumorin, pacientes në Vushtrri i hiqet masa prej 4 kilogramësh

Publikuar më: Një tumor me peshë prej katër kilogramësh është larguar sot nga një paciente në Spitalin “Sheikh Zayed” në Vushtrri, gjatë një ndërhyrjeje komplekse të realizuar nga ekipi i gjinekologëve, me mbështetjen e anesteziologut. Sipas njoftimit të spitalit, pacientja ishte në gjendje të rëndë dhe ishte përballur me këtë problem shëndetësor për rreth dy vite. Pas operacionit, gjendja e saj raportohet të jetë e mirë dhe stabile. Ndërhyrja është udhëhequr nga gjinekologu obstetër Mr. sc. Dr. Blerim Feka, së bashku me gjinekologet obstetre Dr. Fatmire Melenica dhe Dr. Behije Ejupi, si dhe anesteziologun Dr. Rexhep Kovaçi. Spitali e ka cilësuar suksesin e ndërhyrjes si rezultat të mobilizimit dhe profesionalizmit të stafit shëndetësor. Dr. Blerim Feka ka shprehur mirënjohje për drejtorin e spitalit, për mbështetjen e vazhdueshme dhe krijimin e kushteve për realizimin e operacioneve të tilla komplekse.