Tirana, mikpritësja e ardhshme e NATO-s? Edi Rama zbulon detajet për samitin e vitit 2028

Kryeministri i Shqipërisë, Edi Rama, ka bërë të ditur se vendi ynë është përzgjedhur si destinacioni i ardhshëm për mbajtjen e samitit të NATO-s. Gjatë një prononcimi për Radio Televizionin Shqiptar nga Dublini, ku po merr pjesë në samitin e nëntë të Komunitetit Politik Europian, kreu i qeverisë sqaroi se ende po punohet për dakordësimin mbi datën e saktë të këtij organizimi të rëndësishëm ndërkombëtar. Sipas kreut të ekzekutivit, viti 2027 është përjashtuar si mundësi për zhvillimin e këtij eventi. Megjithatë, Rama konfirmoi me bindje se nëse kalendari i Aleancës së Atlantikut të Veriut do të parashikojë një samit për vitin 2028, atëherë Tirana do të jetë qendra ku do të mblidhen liderët e vendeve anëtare. “Shqipëria është vendi i parashikuar për të pritur Samitin e ardhshëm të NATO-s. Çështja mbetet te konsensusi mes shteteve anëtare për kohën e zhvillimit. Me siguri nuk do të jetë viti 2027, por nëse samiti organizohet në 2028, ai do të mbahet në Tiranë. Për këtë nuk ka asnjë dyshim”, deklaroi kryeministri. Qëndrimi i Ramës në Dublin vjen në një periudhë delikate për sigurinë kontinentale. Përveç pjesëmarrjes në punimet e samitit, kryeministri shqiptar ka në agjendë një sërë takimesh dypalëshe me personalitete të larta, mes të cilëve presidenti i Këshillit Europian, Antonio Costa, dhe kryeministrja e Italisë, Giorgia Meloni. Axhenda e këtij takimi të rëndësishëm në Irlandë fokusohet tek sfidat aktuale që po përballon Europa, duke përfshirë këtu procesin e zgjerimit të Bashkimit Europian, sigurinë energjetike, kërcënimet hibride dhe mbështetjen e vazhdueshme për Ukrainën në luftën kundër agresionit rus. Liderët pjesëmarrës po diskutojnë mbi format e reja të koordinimit për të forcuar stabilitetin dhe sigurinë e përbashkët.