Tragjedi në Nju Jork: Shembja e ndërtesës në Bruklin lë pas 8 viktima dhe dhjetëra të lënduar

Një ngjarje e rëndë ka tronditur lagjen Flatbush në Bruklin të Nju Jorkut, ku shembja e një pallati trekatëshe ka shkaktuar vdekjen e tetë personave dhe plagosjen e të paktën 17 të tjerëve. Mes të lënduarve raportohet se ndodhen shtatë fëmijë dhe tre zjarrfikës, të cilët ishin angazhuar në operacionet e shpëtimit. Bilanci tragjik u bë i ditur mëngjesin e së enjtes nga kryebashkiaku i Nju Jorkut, Zohran Mamdani, pas përfundimit të kërkimeve intensive përgjatë natës. Përmes një mesazhi në rrjetin social X, Mamdani shprehu ngushëllimet e thella për humbjen e jetëve, duke e cilësuar ngjarjen si një dërmim për qytetin dhe duke u kërkuar qytetarëve që ta shmangin zonën për të lehtësuar punën e ekipeve të emergjencës. Shembja ndodhi të mërkurën pasdite, rreth orës 16:00 (me orën lokale). Ndërtesa e ndodhur në numrin 1321 të avenysë Flatbush, pranë kryqëzimit me avenynë Bedford, u rrëzua papritur mbi gropën e një kantieri ndërtimi ngjitur, ku po kryheshin gërmime. Objekti, i ndërtuar në vitin 1930, ishte plotësisht i banuar. Si pasojë e shembjes, edhe një ndërtesë fqinje pësoi dëme të konsiderueshme, duke mbetur me apartamente të pambuluara. Sipas Departamentit të Zjarrfikësve të Nju Jorkut (FDNY), gjashtë viktima u identifikuan në vendngjarje, ndërsa dy të tjerë ndërruan jetë në spital. Mes të ndjerëve dyshohet se janë edhe katër punëtorë ndërtimi që po punonin nën strukturën e pallatit në momentin e shembjes. Autoritetet konfirmojnë se katër prej të plagosurve ndodhen në gjendje kritike për jetën. Gjatë gjithë natës, qindra efektivë të zjarrfikësve, të mbështetur nga qen të trajnuar dhe dronë, punuan në kushte të vështira për të gjetur të mbijetuar. Një grua u nxor e gjallë nga rrënojat dy orë pas incidentit. Operacioni u zhvillua nën presionin e kohës, për shkak të paralajmërimeve për një stuhi të fuqishme që pritej të godiste zonën. Hetimet për shkaqet e shembjes janë përqendruar te kantieri ngjitur. Dokumentet e Departamentit të Ndërtimeve tregojnë se që prej muajit maj, ky projekt kishte regjistruar shkelje të shumta, përfshirë vazhdimin e punimeve pavarësisht urdhrit për ndalim, mungesën e masave mbrojtëse për pronat përreth dhe mospërputhjen me projektin e miratuar. Megjithatë, ende nuk është konfirmuar zyrtarisht nëse gërmimet ishin shkaktari direkt i katastrofës. Lagjja Flatbush, e njohur si një qendër e rëndësishme e komunitetit karaibian, është mobilizuar për të ndihmuar banorët e prekur. Bashkia ka ngritur një qendër të posaçme pritjeje, ndërsa kryebashkiaku Mamdani vlerësoi punën e jashtëzakonshme të ekipeve të shpëtimit në këtë operacion tejet të rrezikshëm.