Rama: Qeveria po rrezikon Lojërat Mesdhetare për interesa populiste

Kryetari i Prishtinës, Përparim Rama, ka adresuar kritika të ashpra ndaj ekzekutivit, duke reaguar ndaj pretendimeve të deputetit Basha dhe ministrit Gashani të shprehura në Kuvendin e Kosovës. Sipas Ramës, këto deklarata synojnë dezinformimin e publikut dhe shmangien e përgjegjësive që Qeveria ka lidhur me organizimin e Lojërave Mesdhetare “Prishtina 2030”. Në reagimin e tij, i pari i Kryeqytetit e cilësoi këtë ngjarje si një shans historik për vendin, duke paralajmëruar njëkohësisht se vonesat dhe qasja e gabuar e Qeverisë po e vënë në pikëpyetje suksesin e këtij projekti madhor. Rama akuzoi zyrtarët qeveritarë se po përdorin foltoren e Kuvendit për të manipuluar opinionin publik dhe për të adresuar akuza të pabaza ndaj tij dhe institucionit që ai drejton. Si dëshmi për dështimet në përmbushjen e obligimeve, Rama përmendi letrat zyrtare me vërejtje që Komiteti Ndërkombëtar i Lojërave Mesdhetare i ka dërguar ekzekutivit kosovar. Ai sqaroi se mbështet fuqishëm organizimin e Lojërave dhe përfshirjen e komunave të tjera, por nënvizoi se çdo hap duhet të jetë në harmoni me marrëveshjet dhe Masterplanin e miratuar tashmë. Kryetari i Prishtinës sqaroi pozicionin e tij vendimmarrës, duke theksuar se Kryeqyteti zotëron vetëm 3 nga 12 votat në Komitetin Organizativ. “Qeveria dhe Komiteti Olimpik i Kosovës mbajnë shumicën vendimmarrëse, ndaj ata janë përgjegjësit kryesorë para qytetarëve për vendimet e marra”, shtoi Rama. Në shënjestër të kritikave të tij ishte edhe kryeministri Albin Kurti, të cilin Rama e akuzoi për nxitje të përçarjeve ndërmjet qyteteve në funksion të një agjende populiste. Ai denoncoi mungesën e pagesave ndaj Komitetit Ndërkombëtar, për të cilat Qeveria kishte dhënë garanci zyrtare, si dhe përpjekjet për të ndryshuar Masterplanin e dakorduar. Duke theksuar se afatet kohore janë duke kaluar, Rama paralajmëroi se çdo vonesë e mëtejshme po e rëndon situatën dhe rrezikon këtë mundësi unike për Kosovën. Në fund, ai u bëri thirrje autoriteteve qendrore që të reflektojnë dhe të shlyejnë obligimet e tyre, në mënyrë që Lojërat Mesdhetare të realizohen me sukses dhe të jenë një dëshmi e përfaqësimit dinjitoz të shtetit tonë në arenën ndërkombëtare.