Superliga e basketbollit: Vëmendja te derbi Peja – Trepça, ja orari i plotë i xhiros së nëntë

Fundjava në ProCredit Superligën e Kosovës në basketboll vjen me emocione të reja, teksa zhvillohen ndeshjet e xhiros së nëntë të programit kampional, duke filluar nga data 13 deri më 15 nëntor. Faza e garave hapet të premten në orën 17:00, kur Sigal Prishtina pret në shtëpi skuadrën e Vëllaznimit. Pas triumfit dramatik kundër Pejës, kryeqytetasit synojnë të ruajnë ritmin e fitoreve, ndërkohë që gjakovarët udhëtojnë me objektivin për të arkëtuar pikët e dyta këtë sezon. Kujtojmë se në ndeshjen e parë të zhvilluar në Gjakovë, fitore kishin shënuar bardhekaltrit e Prishtinës. Ditën e shtunë, vëmendja zhvendoset në palestrën “1 Tetori”, ku nga ora 19:30, Bora do të sfidojë Golden Eagle Yllin. Ekipi prishtinas synon të përsërisë suksesin e përballjes së parë ndaj suharekasve, ndërsa të dyja skuadrat hyjnë në këtë duel të motivuara nga fitoret e arritura në xhiron paraprake. E diela sjell ndeshjen kryesore të javës, atë ndërmjet Pejës dhe Trepçës, me fillim nga ora 17:00. Pejanët gjenden në një krizë rezultatesh që nga shtatori, kur kishin shënuar fitoren e fundit pikërisht ndaj mitrovicasve në udhëtim. Përballja me kampionët në fuqi shihet si një mundësi ideale për pejanët që t'i japin fund serisë negative, ndërsa ekipi nga Mitrovica synon vazhdimësinë e formës së mirë në kampionat. Ky xhiro mbyllet në Prizren, me duelin ndërmjet Bashkimit dhe Rahovecit 029. Prizrenasit janë të fokusuar në rimëkëmbje pas disfatës nga Golden Eagle Ylli, ndërsa Rahoveci 029, që po përballet me një formë të luhatshme, do të kërkojë të shkaktojë befasi në këtë transfertë. Orari i ndeshjeve: E premte: 17:00 – Sigal Prishtina vs. Vëllaznimi E shtunë: 19:30 – Bora vs. Golden Eagle Ylli E diel: 17:00 – Peja vs. Trepça 19:30 – Bashkimi vs. Rahoveci 029