Tragjedi në Nju-Jork: Bilanci rritet në tetë viktima pas shembjes së ndërtesës në Bruklin

Numri i viktimave nga shembja e një pallati banimi në lagjen Flatbush të Bruklinit, në Nju-Jork, ka shkuar në tetë, pasi struktura u shemb papritur mbi një kantier ndërtimi ngjitur mbrëmjen e së mërkurës, konfirmoi kryetari i bashkisë, Zohran Mamdani. Gjatë një deklarate dhënë të enjten, kreu i bashkisë bëri të ditur se të paktën 17 persona tjerë, përfshirë tre efektivë të zjarrfikëseve, kanë pësuar lëndime, ndërkohë që ekipet e emergjencës vijojnë operacionet intensive të kërkim-shpëtimit në terren. Incidenti tragjik ndodhi rreth orës 16:00 me kohën lokale (21:00 GMT), kur ndërtesa trekatëshe, e ngritur rreth vitit 1930, u shemb duke rënë mbi hapësirën fqinje ku po zhvilloheshin punime gërmimi. Autoritetet vendore njoftuan paraprakisht se katër prej të lënduarve ndodhen në gjendje kritike për jetën. Mediat vendase raportuan se ekipet e shpëtimit arritën të nxjerrin të gjallë nga gërmadhat të paktën katër mbijetuar dy deri në dy orë e gjysmë pas katastrofës, mes të cilëve ishte edhe një grua shtatzënë. Ndërkohë, autoritetet kompetente pranuan se ende nuk ekziston një shifër e saktë e personave që ndodheshin brenda banesës apo e punëtorëve që po operonin në kantierin ngjitur në momentin e shembjes. Komisionerja e Departamentit të Zjarrfikësve, Lillian Bonsignore, bëri të ditur se mes të prekurve nga kjo ngjarje e rëndë janë edhe shtatë fëmijë, megjithëse nuk u specifikua se cilës grupmoshe u përkasin viktimat e regjistruara deri më tani. Për menaxhimin e situatës dhe operacionet e shpëtimit, autoritetet kanë mobilizuar rreth 250 efektivë të zjarrfikësve dhe të shërbimeve mjekësore të urgjencës, të cilët janë vendosur në zonën e katastrofës.