Kreu i ri i Prokurorisë për Krim të Organizuar: Synojme drejtësi më të shpejtë dhe efikase kundër korrupsionit

Iskra Haxhi Vasileva, e cila ka marrë sot drejtimin e Prokurorisë Themelore Publike për Ndjekjen Penale të Krimit të Organizuar dhe Korrupsionit (PTHP NPKOK), ka bërë të qartë se fokusi i saj kryesor do të përqendrohet te luftimi me efikasitet i korrupsionit dhe shfrytëzimi optimal i kapaciteteve njerëzore e materiale në dispozicion. Pas betimit solemn për marrjen e detyrës para Këshillit të Prokurorëve Publikë, ajo u shpreh se sfidat dhe situata aktuale në këtë dikaster janë plotësisht të njohura për të, çka lehtëson përcaktimin e hapave të ardhshëm. "Prioritetet janë të qarta, ndjekje penale efikase, shfrytëzim maksimal i burimeve që na janë vënë në dispozicion. Jemi të vetëdijshëm se ato janë të kufizuara në disa aspekte, por do të përpiqemi të sigurojmë më shumë burime dhe t'i përdorim ato ekzistuese sa më efikase të jetë e mundur, me qëllim që të arrijmë rezultate më të suksesshme", u shpreh Haxhi Vasileva në fjalën e saj. Duke komentuar gjetjet e raportit të fundit të Komisionit Evropian, ku theksohej mungesa e progresit në luftën kundër korrupsionit, prokurorja e lartë pranoi se sfidat e kësaj periudhe janë komplekse, por të menaxhueshme përmes një qasjeje të vendosur. "Do të përpiqemi të ofrojmë ndjekje penale më efikase dhe më vendimtare aty ku është më e nevojshme, pra në raste dhe situata që prekin vërtet interesin publik dhe janë të rëndësishme për të gjithë ne, për qytetarët dhe për shoqërinë në tërësi", theksoi ajo gjatë prononcimit të saj. Haxhi Vasileva fitoi besimin për të drejtuar PTHP NPKOK-në në procesin zgjedhor të zhvilluar më 28 tetor të këtij viti, ku siguroj 64 vota nga gjithsej 171 fletëvotime të vlefshme. Në këtë garë zgjedhore, përveç saj, aplikuan edhe katër prokurorë të tjerë publikë: Faton Azizi, Trajçe Pelivanov, Lidija Raiçeviq dhe Jovan Cvetanovski.