Martin Zubimendi i jep fund spekulimeve: Nuk e braktis Arsenalin për Atletico Madridin

Mesfushori i Arsenalit, Martin Zubimendi, ka vendosur të sqarojë pozicionin e tij përballë zërave të vazhdueshëm që e lidhin me një largim të mundshëm nga “Emirates Stadium” gjatë afatit kalimtar të janarit. Ndonëse emri i tij është lakuar shpesh si një objektiv i Atletico Madridit, futbollisti spanjoll ka konfirmuar përkushtimin e tij të plotë ndaj klubit londinez. Ai theksoi se fokusi i tij kryesor mbetet vetëm puna në stërvitje për të siguruar një vend në formacionin bazë dhe për të ndihmuar ekipin në arritjen e objektivave sezonalë. “Nuk po shpenzoj energji për çështje jashtë futbollit; kam mjaftueshëm sfida për t’u përqendruar, veçanërisht në përpjekjen time për të fituar besimin e trajnerit dhe një vend në skuadër”, u shpreh Zubimendi. Ai shtoi se dëshiron të grumbullojë sa më shumë minuta në fushë dhe të kontribuojë në garën për titullin e Premier League, i cili sipas tij, mbetet një objektiv mjaft premtues për këtë edicion. Lojtari gjithashtu ka hedhur poshtë kategorikisht çdo kontakt me klube të tjera. “Nuk kam menduar për largim dhe nuk kam pasur asnjë lloj komunikimi me askënd. Ndonjëherë, ajo që shkruhet në media më habit edhe mua. E kuptoj se afrimi i merkatos sjell thashetheme, por besoj se duhet të ketë më shumë kujdes dhe përgjegjësi në publikimin e informacioneve”, deklaroi mesfushori. Në përfundim, Zubimendi u bëri thirrje mediave të tregojnë respekt për lojtarët dhe klubet. “Secili futbollist ka detyrimet e tij ndaj ekipit ku luan. Kam lexuar lajme për një largim të afërt, por ato janë krejtësisht të pavërteta. Tashmë e njoh mirë mënyrën se si funksionon kjo botë dhe këto spekulime nuk më shqetësojnë”, përfundoi ai.