Tragjedi në Pejë: Fëmija dërgohet pa shenja jete në spital nga fshati Treboviq

Një ngjarje e rëndë ka tronditur mëngjesin e së martës fshatin Treboviq të Pejës, ku një fëmijë është gjetur pa shenja jete. Këtë ngjarje tragjike e ka konfirmuar zëdhënësi rajonal i Policisë së Kosovës për rajonin e Pejës, Driton Rugova, i cili ka dhënë detajet e para rreth këtij rasti. Sipas njoftimit zyrtar, autoritetet policore janë alarmuar rreth orës 09:30 nga stafi i Emergjencës në Spitalin Rajonal të Pejës, pasi në këtë institucion shëndetësor ishte sjellë një fëmijë i cili nuk jepte më shenja jetese. “Me datën 29.09.2026, rreth orës 09:30, Policia është njoftuar nga Emergjenca e Spitalit rajonal në Pejë se është pranuar një fëmijë pa shenja jete. Njësitet policore menjëherë kanë dalë në vendin e ngjarjes, në fshatin Treboviq-Pejë, si dhe në Spitalin rajonal në Pejë, me qëllim të sqarimit të rrethanave që kanë të bëjnë me rastin”, ka deklaruar Rugova. Për këtë ngjarje është vënë në dijeni menjëherë Prokurori i Shtetit, i cili ka ndjekur procedurat e mëtejshme. Me vendim të prokurorit kompetent, trupi i pajetë i viktimës u është dorëzuar familjarëve për organizimin e ceremonisë mortore. Ndërkohë, strukturat policore dhe organet e drejtësisë mbeten të angazhuara në terren për të zbardhur plotësisht rrethanat dhe shkaqet që çuan në këtë ngjarje.