Identifikohet heroi i heshtur: Si i riu gjeorgjian përballoi i vetëm grupin e Nurmagomedovit në Abu Dhabi

Është zbuluar identiteti i të riut që u rreshtua në krah të Merab Dvalishvilit gjatë incidentit të dhunshëm në hollin e një hotelit në Abu Dhabi, ku u sulmuan nga Usman Nurmagomedov dhe bashkëpunëtorët e tij. Bëhet fjalë për Saba Lazishvilin, një 21-vjeçar nga Gjeorgjia, i cili është vëllai më i vogël i ish-luftëtarit të njohur të UFC-së, Zviad Lazishvili. Ky zhvillim u bë i ditur vetëm një ditë pas ngjarjes nga gazetari gjeorgjian Giorgi Kokiashvili, i cili përmes një postimi në platformën X shpjegoi se bëhet fjalë për një mundës të ri, i cili pavarësisht se nuk kishte përdorur kurrë grushte në jetën e tij, arriti të përballej me sukses dhe të rrëzonte në tokë disa nga agresorët e grupit kundërshtar, derisa u desh që ta kapnin fizikisht për ta neutralizuar. Vetë Dvalishvili shpjegoi përmes rrjeteve sociale se ngjarja ndodhi ndërsa po jepte një intervistë për RAF, moment kur Usman dhe rreth 20 persona të grupit të tij iu afruan nga shpina, duke nisur agresionin fizik ndaj tij dhe mikut të tij të ri, ndërkohë që ata ndodheshin në Abu Dhabi vetëm dy veta. Pamjet filmike që po qarkullojnë në rrjet dokumentojnë betejën e pabarabartë, ku Lazishvili shihet duke u mbrojtur me guxim përballë një numri dukshëm më të madh sulmuesish. Sipas të dhënave nga mediumi specializuar Bloody Elbow, i riu gjeorgjian ka rrëzuar në tokë dy nga anëtarët e grupit të Nurmagomedovit, ndërsa nga kjo përleshje ka përfunduar vetëm me një çarje nën syrin e djathtë dhe disa shenja mavijosjeje në ballë. Sa i përket historikut familjar në sportet luftarake, vëllai i tij Zviad Lazishvili gëzon një karrierë profesionale në MMA me një bilanc prej 13 fitoresh dhe vetëm një humbjeje. Ai ka mbajtur më parë titullin e kampionit në kategorinë bantamweight të organizatës LFA dhe pati debutimin e tij në oktagonin e UFC-së në tetor të vitit 2021, ku u mposht nga Jonathan Martinez me vendim unanim. Më pas, karriera e tij u shoqërua me sfida, pasi rezultoi pozitiv në testet për substancën e ndaluar klomifen. Kjo solli një pezullim prej dhjetë muajsh nga USADA dhe nëntë muajsh nga Komisioni Atletik Shtetëror i Nevadës, pas të cilave ai u lirua nga kontrata me UFC-në.