Skllavëroi gruan në lokale nate dhe i mori të ardhurat, 6 vite burg për të akuzuarin në Gjakovë

Gjykata Themelore në Gjakovë ka dhënë dënimin kapital për një rast të rëndë të trafikimit me njerëz, duke e dënuar të pandehurin A.P. me gjashtë vjet burgim efektiv dhe një gjobë prej 3 mijë eurosh. Vendimi u mor nga Departamenti i Krimeve të Rënda, nën drejtimin e gjyqtarit Samedin Cena, pas përfundimit të suksesshëm të shqyrtimit gjyqësor. Sipas aktakuzës së zbardhur nga institucioni i drejtësisë, i pandehuri A.P. e kishte vënë nën kontroll të plotë viktimën A.V. nga Prishtina, duke e shfrytëzuar atë përmes dhunës fizike, psikike, kanosjes dhe punës së detyruar. Historia e abuzimit kishte nisur që nga muaji mars i vitit 2021 e deri më 30 janar 2024, pasi i pandehuri fillimisht kishte kontaktuar viktimën përmes rrjeteve sociale dhe ishte takuar me të në lokalin e tij në Deçan. Më pas, ai e kishte sjellë atë për të punuar në lokalin e tij “S.” në Gjakovë gjatë periudhës mars-prill 2021, duke e mbajtur në banesën e tij nën pretekstin e një lidhjeje dashurie. Për t'i humbur gjurmët dhe për të vazhduar shfrytëzimin, nga maji i vitit 2021 deri në shtator të vitit 2022, ai e transferoi viktimën në një lokal me muzikë live në Pejë, ndërsa deri në muajin nëntor 2022 e detyroi të punonte në një tjetër lokal në fshatin Volljak të Komunës së Klinës. Në fazën e fundit të kësaj kalvare, e dëmtuara ishte kthyer sërish në Gjakovë, ku u detyrua të punonte në lokalin me muzikë live “Te X.” deri në muajin tetor të vitit 2023. Gjatë gjithë kësaj kohe, e dëmtuara është detyruar të punojë kundër vullnetit të saj, ndërsa i gjithë fitimi nga puna e saj ka përfunduar në xhepin e të pandehurit A.P. Në rastet kur të ardhurat nga puna e saj nuk arkëtoheshin drejtpërdrejt, i akuzuari e detyronte viktimën që të paguante detyrimet e tij financiare, përfshirë qiranë e lokalit, pagat e punëtorëve dhe këstet mujore të kredisë. Sipas vendimit të Gjykatës në Gjakovë, dënimi me gjobë prej 3 mijë eurosh ndaj të pandehurit do të ekzekutohet tridhjetë ditë pas plotfuqishmërisë së këtij aktgjykimi.