“Vetëm Zoti e di sakrificat tona” – Bashkëshortja e Raphinhas shpërthen në emocione pas marrëveshjes së re me Barcelonën

Vazhdimi i bashkëpunimit mes sulmuesit brazilian Raphinha dhe gjigantit katalanas, Barcelona, ka sjellë një valë gëzimi dhe krenarie në familjen e lojtarit. Këtë e ka dëshmuar më së miri reagimi prekës i bashkëshortes së tij, Natalia Belloli, e cila ka ndarë ndjenjat e saj përmes një postimi në rrjetet sociale. Duke vënë në pah rrugëtimin e vështirë deri në këtë pikë të karrierës, ajo ka theksuar sfidat me të cilat janë përballur ndër vite. “Vetëm Zoti e di gjithçka që kemi kaluar dhe përballuar për të arritur deri këtu”, – u shpreh ajo, duke shprehur entuziazmin për këtë kapitull të ri. Belloli nuk i fshehu emocionet për lidhjen e fortë që sulmuesi ka me fanellën e klubit blaugrana. “Të të shoh duke realizuar këtë ëndërr dhe duke shkruar një tjetër kapitull të historisë tënde në një klub që e do kaq shumë, më mbush zemrën me krenari dhe lumturi”, – shtoi ajo më tej. Ajo e mbylli dedikimin e saj romantik dhe mbështetës me një falënderim të sinqertë për qëndrueshmërinë dhe besimin e treguar ndër vite, duke i përcjellë një urim të përzemërt për të ardhmen. “Faleminderit që nuk u dorëzove kurrë, që besove tek ëndrrat tona dhe, mbi të gjitha, që luftove gjithmonë për ne. Zoti vazhdoftë të bekojë hapat e tu dhe të ndriçojë rrugën tënde! Të duam!”