Kryeministri Rama konfirmon: Tirana do të presë zyrtarisht Samitin e ardhshëm të NATO-s

Kryeministri Edi Rama, i cili po merr pjesë në punimet e takimit të 9-të të Komitetit Politik Evropian (EPC) në Dublin – një ngjarje e bashkëdrejtuar nga Presidenti i Këshillit Evropian, Antonio Costa, dhe kreu i qeverisë irlandeze, Micheal Martin – është ndalur te planet për organizimin e ngjarjeve të rëndësishme ndërkombëtare në vendin tonë. Gjatë një prononcimi për gazetarët, kreu i ekzekutivit shqiptar ka rikonfirmuar se Shqipëria është caktuar zyrtarisht si vendi pritës për një nga samitet e ardhshme të aleancës më të madhe ushtarake në botë, duke theksuar se kryeqyteti shqiptar do të jetë mikpritës i këtij eventi historik. “Po patjetër, Shqipëria është planifikuar si pritësja e radhës e Samitit të NATO. Çështja është që s'ka ende një qëndrim të përbashkët se kur Samiti do të mbahet. Me siguri, jo në 2027. Dhe në 2028 nëse do të ketë një Samit, do të mbahet në Tiranë. Kjo është e gjitha”, u shpreh Rama.