Në New York, Rama flet për lidhjen mes ekonomisë dhe paqes: Çelësi i stabilitetit politik

Kryeministri i vendit, Edi Rama, ka marrë pjesë në punimet e edicionit të tetë të Këshillit Europian të Korporatave, ngjarje kjo e organizuar në qytetin e New York-ut. Gjatë fjalës së mbajtur në këtë tubim, kreu i ekzekutivit shqiptar ka ndarë mendimin se paqja nuk duhet parë thjesht si një rezultat diplomatik që i hap rrugën ekonomisë, por përkundrazi, si një parakusht politik që gjenerohet dhe mbështetet nga vetë zhvillimi ekonomik. Duke vënë theksin te domosdoshmëria e bashkëpunimit dhe reflektimit, Rama shtoi se kontinenti evropian ka ende sfida përpara në drejtim të përvetësimit dhe aplikimit të mençurisë kolektive që vjen nga burime të ndryshme globale. "Dua të them se është një nder dhe privilegj i vërtetë t’ju bashkohem. Kjo platformë, e krijuar për të bashkuar dije që vjen nga burime të papritura, tregon gjithashtu diçka shumë të rëndësishme: kuptimin se paqja nuk është një arritje diplomatike që i paraprin zhvillimit ekonomik, por një kusht politik që zhvillimi ekonomik e bën të mundur. Nuk duhet të harrojmë se masa e vërtetë e progresit është horizonti i mundësive që u lëmë atyre që vijnë pas nesh; dhe për këdo që vjen pas nesh, ky horizont mundësish nuk është vetëm vendi ynë, por bota jonë e përbashkët. Ka kaq shumë gjëra që duhet t’i kuptojmë dhe t’i diskutojmë me njëri-tjetrin, dhe ka kaq shumë mençuri atje jashtë, të cilën Europa nuk ka arritur ta përvetësojë dhe zbatojë", u shpreh ndër të tjera kryeministri gjatë fjalimit të tij.