Padia ndaj gjyqtares Irena Gjoka, Sali Berisha paraqitet në ambientet e SPAK

Kryetari i Partisë Demokratike, Sali Berisha, është paraqitur këtë të martë, më 12 nëntor, në Prokurorinë e Posaçme Kundër Korrupsionit dhe Krimit të Organizuar (SPAK). Prania e tij në këtë institucion lidhet me procesin e pyetjeve lidhur me kallëzimin penal që është depozituar ndaj gjyqtares së Gjykatës së Posaçme Kundër Korrupsionit dhe Krimit të Organizuar, Irena Gjoka. Sipas informacioneve nga gazetarja Klodiana Lala, në këtë seancë dëshmie janë thirrur si kallëzues, krahas kryetarit të opozitës Sali Berisha, edhe dhëndri i tij, Jamarbër Malltezi. Organi i akuzës ka vijuar procedurat hetimore ndaj gjyqtares Gjoka, pasi Gjykata e Posaçme rrëzoi kërkesën e SPAK për pushimin e hetimeve. Me këtë vendim, dosja është kthyer sërish për plotësim të hetimeve dhe për kryerjen e veprimeve shtesë procedurale. Baza e këtij procedimi ndaj gjyqtares Gjoka konsiston në dyshimet për falsifikim të formularit të vetëdeklarimit. Pretendohet se në këtë dokument ajo nuk ka pasqyruar një vendim dënimi të dhënë më parë ndaj saj nga autoritetet gjyqësore në Greqi. Vlen të theksohet se Irena Gjoka është pikërisht gjyqtarja e GJKKO-së e cila ka shqyrtuar dhe firmosur vendimet lidhur me kërkesat e SPAK për dosjen "Partizani", procedim në të cilin ish-kryeministri Sali Berisha dhe Jamarbër Malltezi kanë statusin e të pandehurve.