Përplasje e hapur mes FIFA-s dhe UEFA-s: Beteja ligjore zhvendoset në gjykatat amerikane

Marrëdhëniet mes dy shtëpive më të mëdha të futbollit, FIFA dhe UEFA, kanë hyrë në një fazë tejet kritike, pasi konflikti i tyre politik dhe ligjor, i lidhur me iniciativën e dështuar të njohur si FIFA Forward Enterprise, ka mbërritur zyrtarisht në dyert e drejtësisë amerikane. Nëpërmjet shkresave zyrtare të dorëzuara në një gjykatë federale në Florida, FIFA ka hedhur akuza të rënda ndaj UEFA-s, duke aluduar se ajo ka ndërmarrë një “fushatë dezinformimi” që synon dëmtimin e imazhit të presidentit Gianni Infantino, me qëllim ndikimin e drejtpërdrejtë në garën e ardhshme për kreun e organizatës. Në themel të këtij debati qëndron projekti FIFA Forward Enterprise, përmes të cilit synohej krijimi i një entiteti të ri komercial që do të menaxhonte të drejtat televizive, biletat, marrëveshjet e sponsorizimit, licencimet dhe operimin e turneve madhore të FIFA-s, përfshirë edhe Kupën e Botës, duke përfshirë në strukturë edhe investitorë privatë. Gjatë muajit korrik, shtëpia botërore e futbollit e kishte vlerësuar këtë sipërmarrje të re në afërsisht 20 miliardë dollarë, duke planifikuar shitjen e një pjese minoritare të saj te palët e treta. Ndër investitorët e synuar ishte pozicionuar edhe kompania Thrive Eternal, e cila ka lidhje me Thrive Capital të Joshua Kushner. Megjithatë, ky plan u kundërshtua ashpër nga UEFA, e cila në gusht iu drejtua drejtësisë në SHBA për të siguruar qasje në dokumente dhe dëshmi nga strukturat e FIFA-s në Florida. Shtëpia e futbollit evropian argumentoi se projekti kishte mungesë konsultimi me organet drejtuese dhe se shifra prej rreth 20 miliardë dollarësh ishte tejet e ulët krahasuar me vlerën reale të tregut për asetet e FIFA-s. Njëkohësisht, UEFA bëri të informuar se po vlerëson hapjen e procedurave penale në Zvicër kundër Infantinos dhe individëve të tjerë të përfshirë. Nga ana e saj, FIFA i ka hedhur poshtë me forcë pretendimet e ngritura, duke theksuar në dosjen gjyqësore se UEFA ka keqinterpretuar tërësisht arkitekturën financiare të projektit, duke ngatërruar vlerën e kapitalit me vlerën totale të ndërmarrjes. Sipas llogaritjeve të vetë FIFA-s, vlera e kësaj ndërmarrjeje do t'i kalonte 30 miliardë dollarë. “Pa asnjë bazë, UEFA sugjeron që z. Infantino kërkoi të përfitonte personalisht nga propozimi i FFE-së”, citohet në dokumentet e FIFA-s, referuar agjencisë së lajmeve Reuters, duke mohuar çdo shkelje ligjore apo etike nga ana e numrit një të saj. Kjo lëvizje ligjore e UEFA-s po shihet nga FIFA si një ndërhyrje e lidhur ngushtë me kalendarin zgjedhor presidencial, duke ngritur shqetësimin se kërkesat për transparencë dokumentare po përdoren për qëllime politike në një kohë të ndjeshme. Projekti FFE u anulua përfundimisht në fillim të gushtit, pasi ndeshi në rezistencën e fortë jo vetëm të UEFA-s, por edhe të CONCACAF-it dhe Konfederatës Aziatike të Futbollit. Ndërsa FIFA insistonte se kjo strukturë do të sillte rritje të ndjeshme të të ardhurave për 211 federatat anëtare, kritikët e saj ngritën dyshime të mëdha mbi mënyrën se si ishte konceptuar dhe menaxhuar nisma. Tensioni aktual intensifikohet edhe nga fakti se UEFA dhe CONCACAF po kërkojnë që FIFA të ndajë të paktën 10 milionë dollarë nga rezervat e saj për secilën prej 211 federatave anëtare për ciklin buxhetor 2027–2030, një kërkesë që tashmë po kalon nëpër një proces zyrtar shqyrtimi. Në këtë mënyrë, dështimi i projektit FFE ka zgjeruar fushën e betejës, duke e shndërruar atë në një mosmarrëveshje fundamentale mbi transparencën, menaxhimin e të drejtave komerciale dhe mënyrën e qeverisjes së futbollit global.