RB Leipzig vihet në gjurmët e Lutfi Dalipit, talenti shqiptar shkëlqen në Zvicër

Lutfi Dalipi është shndërruar në një ndër emrat më të lakuar në tregun evropian të transferimeve, falë formës së jashtëzakonshme që po shfaq në futbollin zviceran. Paraqitjet e tij mbresëlënëse kanë rënë në syrin e drejtuesve të klubit gjerman, RB Leipzig, të cilët kanë nisur monitorimin e detajuar të 20-vjeçarit. Dalipi, i cili aktualisht është pjesë e FC Vaduzit, po përjeton një edicion fantastik, duke regjistruar 14 kontribute në gola brenda 13 paraqitjeve në Superligën zvicerane. Këto statistika mbresëlënëse kanë bërë që gjiganti i Bundesligës ta mbajë nën vëzhgim të vazhdueshëm futbollistin, ndonëse për momentin nuk është iniciuar ende asnjë negociatë zyrtare. Interesimi për talentin shqiptar nuk ndalet me kaq. Klube të njohura si Fiorentina, Real Betis dhe SC Braga janë gjithashtu duke ndjekur me vëmendje zhvillimin e tij. Dalipi, i cili është në pronësi të BSC Young Boys, po luan këtë sezon në formë huazimi te Vaduzi, ku është konfirmuar si një nga zbulimet më të mëdha të kampionatit. Krahas karrierës në nivel klubesh, vëmendja është përqendruar edhe te e ardhmja e tij në arenën ndërkombëtare. Pasi ka vendosur t'i japë fund rrugëtimit me përfaqësueset e Zvicrës, 20-vjeçari mbetet i hapur për të vendosur për të ardhmen e tij, me mundësinë e përfaqësimit të Kosovës ose Shqipërisë në vijim.