RB Leipzig vihet në ndjekje të talentit shqiptar, Lutfi Dalipi

RB Leipzig është bërë klubi më i fundit që ka shfaqur interesim serioz për shërbimet e sulmuesit Lutfi Dalipi. Aktualisht, 20-vjeçari me prejardhje nga Presheva është pjesë e FC Vaduz, ku luan në formë huazimi nga skuadra e BSC Young Boys. Sipas informacioneve të fundit, gjiganti i Bundesligës po e vëzhgon me vëmendje progresin e lojtarit. Megjithatë, bëhet e ditur se interesi i gjermanëve për momentin mbetet vetëm në fazën e monitorimit, pa ndërmarrë ende hapa konkretë për një transferim të mundshëm. Megjithatë, Leipzig nuk është i vetmi në garë për talentin e ri. Emri i Dalipit ka tërhequr vëmendjen e disa klubeve të njohura evropiane, ku që nga muaji shtator, Fiorentina, Real Betis dhe SC Braga kanë nisur të ndjekin nga afër paraqitjet e tij në fushë. Lojtari është i lidhur me një kontratë afatgjatë me Young Boys, e cila skadon në vitin 2030, ndërsa vlera e tij në tregun e transferimeve vlerësohet aktualisht në 1.5 milion euro, bazuar në të dhënat e platformës Transfermarkt. Krahas karrierës në klub, Dalipi po përballet edhe me një vendim të rëndësishëm sa i përket karrierës ndërkombëtare. Në javët në vazhdim pritet të mësohet zyrtarisht se cilën kombëtare do të përfaqësojë ai në të ardhmen. Kujtojmë se futbollisti nga Presheva ka njoftuar tashmë Federatën e Zvicrës se nuk do të vazhdojë më me ta. Ky vendim vjen si pasojë e një premtimi emocional që Dalipi i ka dhënë gjyshit të tij, për të veshur fanellën e Kosovës ose të Shqipërisë.