Trepça tregon karakter në Greqi, por ndalet nga Promitheas në FIBA Europe Cup

Kampioni aktual i Kosovës, Trepça e Mitrovicës, nuk ka arritur të arkëtojë pikë në udhëtimin e vështirë drejt Greqisë, ku u përball me skuadrën e Promitheas Patras BC. Ndeshja e vlefshme për xhiron e gjashtë të FIBA Europe Cup u mbyll me rezultatin 81:71 në favor të vendasve. Fillimi i takimit ishte më i mirë për grekët, të cilët dominuan dhjetëminutëshin e parë duke krijuar një epërsi prej tetë pikësh, 17:9. Megjithatë, mitrovicasit reaguan në periudhat në vazhdim, duke ngushtuar diferencën dhe duke luajtur një basketboll më të baraspeshuar. Në pushimin mes pjesëve, rezultati në tabelë pasqyronte shifrat 37:31 për vendasit. Intensiteti i lartë vazhdoi edhe në çerekun e tretë, ku të dyja palët treguan angazhim të lartë në parket. Pas 30 minutash lojë, epërsia e Promitheas ishte reduktuar në gjashtë pikë, 53:47, duke lënë gjithçka të hapur për finalen e ndeshjes. Megjithatë, periudha e fundit ishte vendimtare. Skuadra greke arriti të shkëputet sërish, duke shkuar në 14 pikë epërsi në minutën e 35-të (73:59), avantazh që e menaxhoi me sukses deri në rënien e sirenës përfundimtare, duke vulosur fitoren 81:71. Pas këtij takimi, renditja në grup e sheh Trierin në krye me 12 pikë, i ndjekur nga Promitheas me 10 pikë, ndërsa Trepça mbetet në vendin e tretë me 9 pikë. Te skuadra fituese u dalluan New Williams me 19 pikë dhe Shawn Jones me 15 sosh.