Mexhiti akuzon BDI-në: Keni shërbyer si urë për depërtimin e 'botës serbe' në shtetin tonë

Bashkëkryetari i koalicionit VLEN, Izet Mexhiti, ka hedhur akuza të rënda në drejtim të Bashkimit Demokratik për Integrim (BDI), duke pretenduar se gjatë mandatit të tyre qeverisës, kjo forcë politike ka lehtësuar shtrirjen e ndikimit serb në Maqedoninë e Veriut. Sipas tij, ky ndikim është realizuar nëpërmjet kanaleve politike, lidhjeve me nëntokën dhe sektorit financiar. Në një reagim të publikuar në rrjetet sociale, Mexhiti u referua një dokumenti zyrtar, i cili dëshmon se si qeveria e kaluar, e përbërë nga LSDM dhe BDI, krijoi bazën ligjore dhe institucionale për hyrjen e “Alta Bankës” nga Serbia në tregun tonë. Ai theksoi se paralajmërimet e tij të bëra gjatë viteve 2021, 2022 dhe 2023, tashmë po gjejnë konfirmim faktik, ndonëse në atë kohë shumëkush mund të ketë qenë skeptik ndaj pretendimeve për infiltrimin e agjendës së “botës serbe”. “Sot, kur opinioni publik ka parë dokumentin zyrtar që i hapi dyert ‘Alta Bankës’, konstatoj se koncepti i ‘botës serbe’ i ka lëshuar rrënjët thellë në institucionet tona. Edhe pse isha në dijeni të situatës, përmasat e këtij bashkëpunimi me Serbinë kanë kaluar çdo pritshmëri,” u shpreh Mexhiti. Ai shtoi se BDI-ja, e cila sot tenton të shfaqet si gardiane e nacionalizmit, ka qenë pikërisht ajo që ka miratuar këtë proces të kapjes së shtetit. Sipas Mexhitit, depërtimi i ndikimit serb është realizuar në tri shtylla kryesore: përmes projektit politik “Open Balkan”, kontrollit të nëntokës përmes mafisë së bixhozit dhe penetrimit në sektorin bankar. Ai e cilësoi këtë ndërlidhje si një kancer për shoqërinë, ku krimi dhe shteti janë shkrirë në një të vetme. Në fund, bashkëkryetari i VLEN-it paralajmëroi se maskat e BDI-së po bien dhe se e vërteta po del në pah. Ai u shpreh i bindur se trinomi “Bota serbe – nëntoka serbe – banka serbe” po shkatërrohet gradualisht dhe se përgjegjësit për këtë “epidemi filoserbe” do të përballen me pasojat e veprimeve të tyre.