Beteja për shikimin: Erjon Vishkulli pas operacionit të suksesshëm, përgatitet për ndërhyrjen vendimtare

Erjon Vishkulli, i riu që mbeti i plagosur gjatë protestave në Tiranë, ka dhënë një përditësim mbi gjendjen e tij shëndetësore. Përmes një komunikimi në rrjetet sociale, ai konfirmoi se ndërhyrja e sotme kirurgjikale ka përfunduar me sukses. Megjithatë, për Vishkullin, rruga drejt shërimit të plotë mbetet sfiduese, pasi javën e ardhshme ai do t'i nënshtrohet një tjetër operacioni, të cilin e konsideron si etapën më kritike dhe më të rëndësishme të këtij procesi, pasi është përcaktues për rikthimin e shikimit të tij. Duke reflektuar mbi vështirësitë e mëdha që ka përjetuar, Vishkulli shprehu vendosmërinë e tij për të mos u dorëzuar përballë fatit. Ai falënderoi të gjithë ata që e mbështesin dhe luten për të, duke shtuar: “Ndërhyrja sot kaloi me sukses. Por beteja vazhdon... Javën e ardhshme më pret një tjetër ndërhyrje, ndoshta më e rëndësishmja e gjithë këtij rrugëtimi, pasi lidhet drejtpërdrejt me shikimin tim. Pas gjithë dhimbjeve dhe sfidave që kam kaluar, shpresa ime më e madhe është të rikthej dritën që dua të shoh në jetën time. Nuk e di çfarë më pret, por një gjë e di: nuk do të dorëzohem kurrë! Zoti më dhëntë forcë dhe e bëftë mbarë.” Kujtojmë se ngjarja e rëndë ndodhi gjatë përplasjeve mes protestuesve dhe forcave të rendit në sheshin “Skënderbej”, ku 28-vjeçari nga Elbasani mori lëndime të rënda në sy. Pas ndihmës fillestare në Spitalin e Traumës në Tiranë, ai u transferua drejt Italisë për një trajtim më të specializuar, ku mjekët po punojnë për të shpëtuar shikimin e tij. Ndërkohë, autoritetet ligjzbatuese në Tiranë kanë intensifikuar hetimet për zbardhjen e plotë të rrethanave të ngjarjes. Prokuroria ka dërguar një letërporosi drejt autoriteteve italiane, duke kërkuar sekuestrimin e objektit të huaj që pritet të hiqet nga syri i të riut, në mënyrë që t'i nënshtrohet ekspertizës mjeko-ligjore. Paralelisht, po hetohet edhe sjellja e efektivëve të policisë gjatë protestës, për të verifikuar nëse përdorimi i forcës ka qenë brenda kornizave ligjore.