Sulm i ashpër nga Sepp Blatter: Infantino është bërë diktator, i duhet trajtim psikiatrik

Ish-presidenti i FIFA-s, Sepp Blatter, ka shpërthyer në akuza të rënda ndaj pasuesit të tij në krye të futbollit botëror, Gianni Infantino. 90-vjeçari, përmes një interviste për revistën gjermane 'Der Spiegel', ka vënë në pikëpyetje integritetin dhe mënyrën e qeverisjes së bashkatdhetarit të tij, duke theksuar se institucioni më i madh i futbollit po vuan nën drejtimin aktual. Sipas Blatterit, Infantino ka humbur busullën, duke u verbuar nga pushteti pas afrimit të tij me presidentin amerikan, Donald Trump. Ish-kreu i FIFA-s beson se ky takim ka ndryshuar vizionin e Infantinos, i cili tashmë e shikon veten si një figurë që synon të monopolizojë sportin më të dashur në planet. Një nga pikat më kritike të Blatterit është vendimi i diskutueshëm për t'i dhënë Çmimin e Paqes Donald Trumpit. Ai e ka cilësuar këtë veprim si një çmenduri, duke e lidhur me ironinë e konflikteve të mëvonshme të Trumpit me Iranin. Përveç kësaj, Blatter akuzon Infantinon se përdor burimet financiare të FIFA-s si mjet shantazhi për të siguruar votat e federatave kombëtare, duke u premtuar atyre shuma të mëdha parash në këmbim të mbështetjes. “Ai është një diktator. Më tregojnë se askush nuk guxon të ndajë ashensorin me të; ai sillet si një person i paprekshëm”, deklaroi Blatter, i cili shkoi edhe më tej duke sugjeruar se sjellja e Infantinos tregon nevojën për një vlerësim psikiatrik. Ai kritikoi gjithashtu tentativat e dështuara për shitjen e të drejtave komerciale të Kupës së Botës, duke theksuar se Infantino nuk njeh më asnjë kufi në ambiciet e tij. Me afrimin e zgjedhjeve të vitit 2027, Blatter shprehu shpresën se UEFA do të gjejë një kandidat të fortë për ta rrëzuar presidentin aktual. Ai e sheh Sebastian Coe-n, kreun e Federatës Botërore të Atletikës, si një alternativë ideale, duke vlerësuar profilin e tij prej një lideri serioz nga vendi ku futbolli e ka zanafillën, Anglia. Kujtojmë se Sepp Blatter, i cili drejtoi FIFA-n nga viti 1998 deri në 2015, nuk ka pasur asnjë kontakt me Infantinon që nga fillimi i vitit 2016. Ndërsa FIFA ka hedhur poshtë disa nga këto pretendime përmes reagimeve zyrtare, përplasja mes dy figurave historike të futbollit paralajmëron një betejë të ashpër për të ardhmen e këtij organizmi botëror.