Tragjedi në Pogradec: 40-vjeçari gjendet pa shenja jete në banesën e tij

Një ngjarje e rëndë ka tronditur pasditen e kësaj të mërkure fshatin Gështenjas të Pogradecit. Shtetasi me inicialet S.Y., 40 vjeç, është gjetur i pajetë brenda ambienteve të shtëpisë së tij, ku dyshohet se i ka dhënë fund jetës duke u varur. Zbulimi tragjik është bërë nga fqinjët e viktimës, të cilët kanë njoftuar menjëherë forcat e rendit. Sipas informacioneve paraprake, 40-vjeçari jetonte i vetëm dhe përballej me kushte të rënda ekonomike, faktorë këta që dyshohet se e kanë shtyrë drejt këtij akti fatal. Grupi hetimor ka mbërritur në vendngjarje dhe po punon për zbardhjen e plotë të rrethanave të kësaj ngjarjeje. Ndërkohë, trupi i pajetë është dërguar në morg për t'iu nënshtruar ekspertizës mjekoligjore, e cila do të përcaktojë shkaqet zyrtare të vdekjes.