Tragjedia në Leeds: 16-vjeçarja humb jetën pas sulmit mizor me thikë nga rivalja e saj

Një ngjarje tronditëse ka ndodhur në qytetin e Leeds në Angli, ku një 16-vjeçare, e identifikuar si Chloe Dransfield, ka humbur jetën pasi u qëllua për vdekje me thikë. Autorja e dyshuar e këtij akti të rëndë është 18-vjeçarja Kayla Smith, e cila dyshohet se e ka goditur viktimën pesë herë në shpinë dhe qafë, si pasojë e një konflikti që buronte nga një marrëdhënie dashurie. Në seancën gjyqësore të zhvilluar në Gjykatën e Kurorës në Leeds, prokurori Mark McKone zbuloi detaje rrëqethëse mbi këtë përballje të paralajmëruar. Sipas provave, mes vajzave kishte pasur shkëmbime të vazhdueshme kërcënimesh. Në një telefonatë përmes FaceTime, Smith kishte paralajmëruar viktimën se do ta godiste me thikë në fyt, ndërsa Chloe kishte sfiduar rivalen e saj duke u shprehur se nuk ndiente frikë. Sipas akuzës, në këtë ngjarje dyshohet se kanë pasur rol edhe dy persona të tjerë, Blake Doëling dhe Archie Rycroft. Doëling, 18 vjeç, i cili kishte qenë në lidhje me të dyja vajzat, akuzohet se e ka dërguar Smith-in në vendin ku ndodhej viktima, duke qenë në dijeni të armiqësisë mes tyre. Nga ana tjetër, 20-vjeçari Archie Rycroft dyshohet se e ka ndjekur autoren për të filmuar përballjen, duke e inkurajuar atë që të ushtronte dhunë. Pamjet e siguruara nga kamerat e sigurisë tregojnë momentin kur Smith del nga banesa në orën 05:10 të mëngjesit, e veshur me pizhame dhe duke mbajtur një objekt të mprehtë. Pas sulmit fatal, ajo dhe Rycroft janë kthyer në banesë. Kur gjyshi i 18-vjeçares ka kërcënuar se do të njoftonte autoritetet, Smith i ka pohuar ftohtësisht se Chloe kishte ndërruar jetë. Ndihma e parë mjekësore u kërkua vetëm 37 minuta pas sulmit. Në sallën e gjyqit, Kayla Smith ka pranuar faktin se ka kryer goditjet me thikë ndaj 16-vjeçares, por ka mohuar kategorikisht qëllimin për ta privuar nga jeta. Hetimet mbi rolet specifike të secilit të përfshirë në këtë vrasje makabre vazhdojnë.