Takim domethënës në Paris: Kryeministri Kurti pritet nga studenti mitrovicas që po ndërton karrierë në Asamblenë Kombëtare të Francës

Kryeministri i Kosovës, Albin Kurti, gjatë qëndrimit të tij në Francë, ka zhvilluar një takim të veçantë me Genc Hamitin, një të ri me prejardhje nga Mitrovica, i cili aktualisht është pjesë e stafit të deputetit francez, Stéphane Hablot, në Asamblenë Kombëtare të Francës. Lajmin për këtë takim e ka bërë të ditur vetë deputeti francez përmes një njoftimi në rrjetet sociale. Në postimin e tij, Hablot ka vënë theksin te rrugëtimi i Gencit, duke treguar se ai është shtetas francez, familja e të cilit ishte shpërngulur nga Kosova si pasojë e luftërave për të nisur një jetë të re në Francë. Aktualisht, Genc Hamiti po ndjek studimet e vitit të pestë në Universitetin e Parisit, ndërsa paralelisht është i angazhuar si asistent pedagogjik në Sorbonë, ku u ligjëron studentëve të vitit të parë. Për të dytin vit radhazi, ai po ushtron me sukses detyrën e bashkëpunëtorit parlamentar të deputetit Hablot. Sipas deputetit francez, ky takim ka qenë një moment krenarie për të riun shqiptar, i cili pati rastin të mirëpresë kreun e ekzekutivit kosovar. Nga ana tjetër, familja e Gencit, me origjinë nga Mitrovica, ka shprehur emocionet dhe krenarinë e tyre për këtë arritje dhe përfaqësim dinjitoz të djalit të tyre në institucionet e larta franceze.