Grabitje e dhunshme në Gjakovë: 7 vite burg për personin që vodhi 115 euro

Gjykata Themelore në Gjakovë ka shqiptuar një dënim prej shtatë vitesh burgim dhe një gjobë prej 500 eurosh ndaj të pandehurit A.M., pasi e shpalli atë fajtor për veprën penale të grabitjes. Vendimi u mor nën drejtimin e kryetarit të trupit gjykues, gjyqtarit Sulltan Dobraj, pas përfundimit të shqyrtimit gjyqësor. Sipas dosjes së Prokurorisë Themelore në Gjakovë, incidenti ka ndodhur pasditen e 1 qershorit 2026, rreth orës 17:50, në afërsi të këndit të lojërave “Kids Center”, në rrugën “Ferid Domi”. I akuzuari, në bashkëpunim me dy persona të mitur, kishte organizuar një takim me viktimën E.B., i cili rezultoi të ishte një kurth. Në momentin e takimit, A.M. dyshohet se ka ushtruar dhunë fizike duke mbajtur një thikë në dorë, me të cilën e ka kërcënuar viktimën. Pasi ka kapur çantën e të dëmtuarit, ai e ka goditur këtë të fundit disa herë me dorezën e mjetit të mprehtë në krahun e majtë, duke arritur t'ia shkëpusë çantën me forcë. Pas përvetësimit të çantës, nga portofoli që ndodhej brenda saj, i pandehuri ka marrë shumën prej 115 eurosh. Përpara se të largoheshin nga vendi i ngjarjes, i akuzuari dhe bashkëpunëtorët e tij të mitur kanë vazhduar ta godasin viktimën me grushte në pjesë të ndryshme të trupit, duke i shkaktuar këtij të fundit lëndime të lehta trupore.