Ndryshime në krye të Odës së Mjekëve: Prof. Dr. Nikolla Jankullovski merr drejtimin e institucionit

Oda e Mjekëve të Maqedonisë së Veriut ka zyrtarizuar emërimet e reja në strukturat e saj drejtuese. Gjatë seancës së mbajtur sot në Kuvendin e kësaj organizate profesionale, Prof. Dr. Nikolla Jankullovski është votuar unanimisht si kryetar i ri, ndërsa mjeku Idriz Orana është emëruar në postin e nënkryetarit. Krahas udhëheqësisë së re, Kuvendi ka përcaktuar edhe tre nënkryetarët përgjegjës për nivele të ndryshme të sistemit shëndetësor: Biljana Petkovska Ognjanova do të mbulojë kujdesin shëndetësor parësor, Lençe Nelloska do të udhëheqë kujdesin sekondar, ndërsa Risto Todorov është zgjedhur nënkryetar për kujdesin shëndetësor terciar. Zgjedhja e prof. Jankullovskit vjen si një vlerësim për bagazhin e tij të pasur profesional. Ai njihet për eksperiencën e gjatë në sferën akademike, menaxheriale dhe klinike, duke qenë një figurë e angazhuar prej vitesh në avancimin e arsimit të lartë mjekësor dhe mbrojtjen e integritetit të profesionit të mjekut në vend. Duke komentuar detyrën e re, kryetari Jankullovski e vlerësoi këtë pozicion si një përgjegjësi të lartë institucionale. "Fokusi im do të jetë në mbrojtjen dhe promovimin e të drejtave dhe statusit të të gjithë mjekëve në vendin tonë, promovimin e transparencës në punën e Dhomës dhe digjitalizimin e proceseve, përfshirjen aktive të Odës në miratimin e zgjidhjeve ligjore në fushën e kujdesit shëndetësor, ndërsa përmes zgjidhjeve të reja funksionale, kontributin në krijimin e kushteve më të mira të punës për mjekët dhe trajtimin e pacientëve", deklaroi Jankullovski pas zgjedhjes së tij.