Përplasje në Beograd: Vuçiq vë në shënjestër Listën Studentore për Kosovën

Presidenti i Serbisë, Aleksandar Vuçiq, ka lëshuar akuza të ashpra ndaj përfaqësuesve të Listës Studentore për Kosovën, duke vënë në dyshim kredibilitetin e tyre politik dhe qëndrimet e tyre në raport me Listën Serbe dhe zhvillimet në Kosovë. Gjatë një konference për media, Vuçiq shprehu shqetësimin e tij për gjendjen e komunitetit serb, ndërsa kritikoi mungesën e reagimit të kësaj liste ndaj deklaratave të kryeministrit të Kosovës, Albin Kurti. Sipas presidentit serb, heshtja e studentëve ndaj komenteve të Kurtit mbi njohjen e mundshme të pavarësisë së Kosovës nga pushteti i ardhshëm në Serbi është e papranueshme. “Ata nuk reaguan asnjë çast ndaj deklaratës së Kurtit, i cili u shpreh se do të shohim qëndrimin e qeverisë së re serbe lidhur me njohjen e pavarësisë. Për këtë nuk pati asnjë përgjigje nga ana e tyre”, deklaroi Vuçiq. Në vijim të kritikave, Vuçiq vuri në pikëpyetje edhe përfaqësimin e njërit prej figurave të kësaj liste, duke pretenduar se ai nuk ka lidhje reale me territorin e Kosovës. Sipas tij, ky përfaqësues e ka vizituar Kosovën vetëm tri herë gjatë tërë jetës së tij dhe nuk jeton atje. Presidenti serb gjithashtu akuzoi këtë grupim se po shmang qëllimisht bashkëpunimin me Listën Serbe, subjektin politik që mbështetet nga Beogradi zyrtar. Ai pretendoi se ka njohuri të plota mbi agjendat e tyre dhe mënyrën se si ata synojnë të veprojnë. Në fund të fjalës së tij, Vuçiq u bëri thirrje përfaqësuesve të Listës Studentore për Kosovën që t'i përgënjeshtrojnë këto pretendime. Ai shtoi se do të mirëpriste çdo sqarim, duke theksuar se fokusi i tij mbetet te sukseset dhe mbijetesa e Serbisë, duke u distancuar nga ato që ai i quajti lajme të këqija për vendin.