Tragjedi në futbollin francez: 22-vjeçari ndërron jetë në fushën e stërvitjes

Një ngjarje e rëndë ka tronditur botën e futbollit në Francë. Wanis Honsor, mbrojtësi 22-vjeçar i skuadrës Saint-Denis FC, ka humbur jetën në mënyrë tragjike gjatë një seance stërvitore, pasi pësoi një arrest kardiak të papritur në fushën e lojës. Pavarësisht ndërhyrjes së menjëhershme të stafit mjekësor dhe përpjekjeve maksimale për ta rikthyer në jetë, i riu nuk ka mundur t'u mbijetojë pasojave të arrestit kardiak, duke ndërruar jetë në vendngjarje. Lajmi për ndarjen e parakohshme nga jeta të futbollistit është përcjellë me dhimbje të thellë nga FC Rouen, klubi ku Honsor u formua si lojtar. Në një mesazh ngushëllimi, klubi shprehu pikëllimin për humbjen e ish-lojtarit të tyre, i cili gjatë sezonit 2023/2024 kishte regjistruar tri paraqitje me ekipin e parë, duke gjetur edhe rrugën e rrjetës. “FC Rouen 1899 mësoi këtë mëngjes me trishtim të madh për vdekjen e papritur të Wanis Honsor, i cili pësoi një arrest kardiak gjatë një seance stërvitore me klubin e tij Saint-Denis FC”, thuhet në njoftimin zyrtar të klubit francez.