Veliaj i drejtohet Taulant Ballës, kërkon komision hetimor për Ramën dhe ministrin Gogu: Më kërcënuan për të dhënë dorëheqjen

Kryebashkiaku i Tiranës, Erion Veliaj, i ka kërkuar zyrtarisht kreut të Grupit Parlamentar të Partisë Socialiste, Taulant Balla, ngritjen e një komisioni hetimor parlamentar për atë që i cilëson si ndërhyrje dhe kërcënime të ushtruara ndaj tij nga kryeministri Edi Rama, përmes ministrit të Drejtësisë, Toni Gogu. Në një deklaratë publike të datës 11 nëntor, Veliaj pretendon se transferimi i tij nga paraburgimi në Durrës drejt Fierit dhe kushtet e qëndrimit në paraburgim mund të jenë përdorur si mjete presioni politik, me qëllim që ai të pranonte organizimin e protestave në Tiranë dhe të jepte dorëheqjen nga mandati i kryetarit të bashkisë. Veliaj shprehet se është i gatshëm të dëshmojë nën betim përpara Kuvendit, të përballet drejtpërdrejt me ministrin e Drejtësisë, Toni Gogu, si dhe të paraqesë çdo provë që disponon. Ai kërkon gjithashtu që të njëjtit standard llogaridhënieje t’i nënshtrohet edhe kryeministri Edi Rama. Kryebashkiaku thekson se kërkesën ia ka drejtuar vetë shumicës socialiste, duke argumentuar se kontrolli kushtetues mbi qeverinë nuk duhet të varet nga përkatësia politike e personave që duhet të japin llogari. Ndërkohë, Veliaj bën me dije se ka vënë në dijeni edhe Kongresin e Autoriteteve Lokale dhe Rajonale të Këshillit të Evropës, si dhe trupin diplomatik të akredituar në Shqipëri. Ai thotë se ka kërkuar edhe ruajtjen e menjëhershme të provave dokumentare dhe audiovizive. “Nuk kërkoj që Kuvendi t’i marrë si të mirëqena deklarimet e mia. Kërkoj që t’i hetojë. Mandati i një kryetari bashkie buron nga vota e qytetarëve dhe vota e qytetarëve nuk mund të bëhet objekt shantazhi politik”, deklaron Veliaj.