Start i barabartë për Maqedoninë U-19: Barazim pa gola ndaj Irlandës së Veriut në kualifikueset e Evropianit

Përfaqësuesja e Maqedonisë së Veriut për grupmoshën U-19 e ka nisur fushatën kualifikuese për Kampionatin Evropian me një rezultat të bardhë, duke ndarë pikët në duelin e parë ndaj Irlandës së Veriut, zhvilluar në stadiumin e Turnovës. Nën drejtimin e përzgjedhësit Dimitar Kapinkovski, ekipi vendas shfaqi ambicie për fitore, megjithatë përballja rezultoi mjaft e luftuar, ku edhe mysafirët patën momentet e tyre kërcënuese, veçanërisht në fazën e fundit të lojës. Momenti më kritik për portën e Aleksandar Trajkovit erdhi në minutën e 84-të, kur Callum Thompson ishte shumë pranë shënimit, por goditja e tij përfundoi në traversë, duke i mohuar fitoren Irlandës së Veriut. Në anën tjetër, Maqedonia e Veriut krijoi mundësi të mira për të zhbllokuar rezultatin. Rastin më të volitshëm në pjesën e parë e pati Ditmir Hoxha, i cili nuk arriti të finalizonte saktë pas një harkimi nga goditja e këndit. Përpjekjet për gol vazhduan edhe në pjesën e dytë përmes Muhamed Kurtishit dhe Ivan Tançevit, të cilët megjithatë nuk ia dolën të mposhtnin portierin kundërshtar. Pas këtij barazimi, vëmendja zhvendoset te sfida e radhës në kuadër të turneut kualifikues. Të shtunën, Maqedonia e Veriut do të kërkojë pikët e plota në përballjen ndaj Zvicrës, takim ky që do të luhet sërish në Turnovë me fillim nga ora 13:00.