Bisedimet ngecin: Interi dhe Carlos Augusto ende larg marrëveshjes për kontratën e re

Klubi i Interit po vijon përpjekjet për të siguruar vazhdimësinë e Carlos Augustos, mirëpo bisedimet për zgjatjen e bashkëpunimit mes dy palëve po përballen me vështirësi dhe ende nuk kanë prodhuar një akord zyrtar. Sipas burimeve nga media italiane, molla e sherrit në këtë mes është gremina financiare mes pretendimeve të mbrojtësit brazilian dhe propozimit të drejtuesve zikaltër. Përfaqësuesit e klubit dhe lojtari duket se kanë rënë dakord për kohëzgjatjen e marrëveshjes së re deri në verën e vitit 2031, por ngecja mbetet te shifrat. Augusto, i cili po shkëlqen nën urdhërat e trajnerit Cristian Chivu dhe ka fituar së fundmi edhe thirrjen debutuese nga Përfaqësuesja e Brazilit, synon një trajtim ekonomik të barabartë me titullarët kryesorë të skuadrës. Si pikë referimi për pretendimet e tij shërbejnë pagat e futbollistëve të tjerë të repartit defensiv, ku Alessandro Bastoni arkëton 5.5 milionë euro neto për çdo sezon, ndërsa Federico Dimarco pëfiton 5.2 milionë euro. Edhe pse dëshira e Interit është ta mbajë anësorin në Milano, tratativat mbeten të ndërlikuara dhe të hapura. Në këtë skenar, vëmendja nga skuadra të tjera brenda dhe jashtë Italisë mund të shtojë presionin mbi të ardhmen e tij.