Lushaku-Sadriu: Qeverisja e dobët po e rëndon ndjeshëm buxhetin e qytetarëve

Gjatë seancës së jashtëzakonshme kushtuar Raportit të Progresit, shefja e deputetëve të LDK-së, Jehona Lushaku-Sadriu, ka vënë në pah një varg gjetjesh negative për vendin, duke drejtuar akuza të rënda ndaj Qeverisë Kurti për keqqeverisje në shumë sektorë kyç. Ajo theksoi se gjetjet e këtij dokumenti reflektojnë direkt në përditshmërinë e banorëve dhe shtrenjtimin e jetesës, pasojë kjo e drejtpërdrejtë e mungesës së llogaridhënies nga ana e ekzekutivit. “Është fatale që ky raport edhe një herë e vërteton gjendjen alarmante në fushën e energjisë, në fushën e mosinvestimit të transportit dhe qasjes joserioze sa i përket përmirësimit – e krejt këto i kushtojnë qytetarëve tanë në koston e jetesës, e rrisin koston e jetesës për shkak të papërgjegjësisë së kësaj qeverie. Të gjitha këto ndikojnë edhe në shëndetin dhe mirëqenien e familjeve tona”, ka deklaruar ajo. Në emër të forcës politike që përfaqëson, Lushaku-Sadriu kërkoi që ky kuvendim të mos kufizohet vetëm në suaza formale debate, por të prodhojë masa dhe hapa të matshëm institucionalë. Konkretisht, ajo propozoi që kabineti qeveritar të jep llogari para ligjvënësve çdo tre muaj lidhur me përmbushjen e detyrave nga Raporti i Progresit, si dhe të hartojë një strategji të mirëfilltë veprimi brenda afatit prej një muaji. “Ky raport është përgjithësisht me notë jokaluese dhe në emër të LDK-së, kërkoj që të mos përfundojmë vetëm një diskutim, por të dalim me kërkesa konkrete për Qeverinë e Kosovës, e cila duhet t’i raportojë Kuvendit të Kosovës rregullisht, çdo tre muaj, për realizimin e Raportit të Progresit – e brenda 30 ditësh të na paraqesë një plan veprimi, me veprime konkrete se si duhet të përmbushen dhe kush janë përgjegjësit kryesorë”, ka përfunduar Lushaku-Sadriu.